2006年1月23日(一)

仲有三日我就身處北海道啦, 好興奮呀~~ ?, 先旨聲明, 凡係託佐我幫佢買野既, 我唔擔保一定會買到返黎架~ 因為我地呢次既行程將會非常緊密, 同埋我地主要係觀光旅行, 而唔係去血拼, 所以未必會去果D名牌店, 化?品店等等. 所以買唔到既話唔好怨我... 同埋我絕對唔會買白之戀人返黎做手信架, 因為香港都有得賣, 我唔會山長水遠咁係日本拎返黎架, 同埋白之戀人做手信實在太行貨了. (同埋講真我唔覺得好好食喎...)

尋日去佐市中心行街, 度度都鬼死咁迫人, 但因為我仲未買雪褲, 星期日再唔買既話我就無時間買, 因為星期一約佐人食飯, 星期二要返學, 星期三要加班. 尋日去Columbia睇過, 特價佐都要成六百幾蚊, 好貴呀, 同埋senpai話六百幾蚊果條就唔係太好, 八百幾蚊果條就誇張得滯, 於是去佐間戶外旅行用品舖頭買佐條唔出名既牌子, 但都要五百幾蚊, 好貴呀~~~

2006月1月18日(三)

抖佐差唔多一個月, 呢個星期又開學啦, 而家暫定係二, 四返學, 星期二果科係business process design for e-business; 星期四果科係corporate accounting. 尋晚果個tutor真係好恐怖, D英文難聽到暈, 我覺得佢應該係馬拉人, 因為佢既英文聽起上黎同我馬拉客D英文差唔多(都係咁難聽), 講野又「甩甩咳咳」, 淨係一開始講呢科既課程簡介, 對住張紙都講到口疾疾, 我真係頂唔順呀, 所以即刻上網轉tutorial班(呢堂係CSC上, 所以我地即使上緊堂都即刻add-drop科). 跟住講答案果陣佢就淨係照住張紙照讀, 真係好唔掂呀! 都唔知點解會搵D咁既人黎教既?

本來呢班tutorial有30個位, 上堂前只係得4個吉位, 上完堂之後再check, 吉位暴升至18個. 睇黎應該唔只我一個頂唔順...

(邊個匿名者問我做咩顎骨手術呀? 你蒲頭我就話你知, 哈哈~~)

2006年1月15日(日)

週六我同senpai落佐屯門行街, 買佐部DVD recorder連160G內置HD, 3千蚊有找; 另外仲買佐個風筒同鬚刨.

週日我就留係屋企磨, 但呢兩日我既情緒病又發作, 唔知點解心情好低落, 但又講唔出係咩原因(會唔會D藥有影響呢?), 咩都提唔起勁去做, 有friends約我去碌bowling+食tea, 我都唔知點解唔想去, 最後都係0係屋企不斷上網搵旅行既資料, 終於都搵得七七八八了, 用佐好多時間同精神, 自遊行付出既代價真係...

SEM A既成績終於出佐, 兩科都係A, GPA=4. 希望SEM B果科accounting生生性性, 咁我今年既schlorship應該又有著落.

2006年1月13日(五)

星期五係公司annual dinner, 地點又係洲際酒店, 今年既菜色感覺比上年好佐, 同埋有我最愛既鵝肝, 好味道~~ 但果個椰汁雪蛤膏就唔得啦, 洗又洗得唔乾淨, 味道又唔好食...

記得舊年抽?抽到個爛鬼投射燈(我都唔記得塞佐去邊), 今年就咩都抽唔到. 不過呢度D?品就無以前元朗咁有睇頭啦, 買埋D什麼水晶手/頸鏈, VW電話繩, 名牌鎖匙扣(我覺得最鬼無用就係呢樣), 散子包, card holder, 鬼死咁多部MP3... 完全唔吸引.

完佐之後同同事夾份搭的士返元朗, 六折的士每人都係$31, 好抵~~

2006年1月12日(四)

星期三, 四過佐非常難捱既兩日, 事緣係我因為身體出現某些問題, 所以要入院檢查. 11號5點鐘去到法國醫院, 上到病房就開始佐無聊兼漫長既住院生涯, 果日我全日淨係晨早飲佐杯麥片, 下午飲埋D粟米魚肚羹, 入院後食佐碗瘦肉粥就要開始禁食, 因為我第二日要照內窺鏡, 所以果晚仲要飲瀉藥, 果D瀉藥極度難飲, 陣味好難聞好攻鼻攻喉, 令人好想嘔, 而家諗番起果陣味都會作嘔, 好難頂~~~

食完碗粥一D都唔飽, 仲係好肚餓, 最慘係隔離床竟然買佐煲仔飯黎食, 好鬼香呀, 嗚嗚. 跟住我就刨旅遊書, 睇下電視, 十二點左右就訓覺啦.

第二朝六點半比姑娘叫醒, 因為仲要飲多半支瀉藥, 嗚嗚, 真係好難飲呀. 好辛苦咁飲完跟住再訓過, 訓到八點幾起身, 然後九點幾就落去做檢查勒. 做完之後十二點幾被推番上房, 可能D藥力未散, 個人好?, 於是衫都未換就攤落床訓到死佐, 訓到兩點幾先起身, 即刻去沖涼換衫, 因為差唔多成日無食過野, 餓到好頭暈, 手又震, 於是??臨問姑娘可以食得野未, 然後即刻叫佐個叉燒通粉同熱朱古力, 肚餓既時候真係食咩都好好味, 第一啖熱朱古力落肚果刻, 真係非常非常之感動, 覺得好滿足, 但可能係餓過頭, 好細碗既通粉都食唔晒. 食完成個人好?, 即刻又撻落床訓過, 訓到差唔多五點零六點起身, 睇陣報紙, 醫生就黎睇我, 結果如前所料, 係因為該原因, 其他一切正常. 於是等醫生填埋保險張claim form同等姑娘開埋張單, 交埋錢拎埋藥, 差唔多八點幾先離開醫院, 埋單多謝$12054.

總結:
1. 我住過兩次醫院, 上次整顎骨住政府醫院, 今次住私家醫院, 感覺真係好唔同, 服務其實就無咩大分別, 兩次D姑娘都好nice, 而我係政府醫院既主診醫生一向都好好人好nice. 但最大分別就係私隱, 政府醫院鬼咁開揚咩都比人睇到晒, 私家醫院就可以拉簾圍住自己, 又有電視睇~ 當然價錢都好大分別啦~~

2. 健康真係好緊要, 我寧願窮D, 都一定要健健康康, 兩次住院都食唔到野, 對我黎講真係好折磨, 你知我一向都為食架啦~~

3. 唔好問我因為咩野事入院, 我係絕對唔會講既!!

2006年1月8日(日)

今日senpai要去CityU做大專盃既球証, 本來打算我等佢差唔多放工就出去又一城, 行一陣食埋飯先返去, 但因為天氣實在太凍了, 凍到我都唔想出街, 所以我最後匿埋佐係屋企. 但senpai出去搵錢咁辛苦, 我無理由匿係屋企嘆世界, 所以我就出去買菜返屋企煮飯. 但結論就係以我既「廚藝」, 煮出黎既實在唔係太好食...

呢排成日發夢夢見一D唔應該夢見到既人, 好煩呀~~

2006年1月7日(六)

嗚嗚, 呢幾日好凍呀, 凍到都唔想出街~

星期六同senpai出佐花墟球場, 因為佢下午要帶隊女仔比賽, 女仔打完之後我就同senpai去佐九龍灣拎旅行package. 跟住我地扮野去佐D旅行社拎章程, 想參考下佢地既行程, 新華果兩條腸粉, 團團都話淨番兩個位, 真係信佢先奇! 今時今日咁既服務態度.

之後我地再落番花墟睇男仔比賽, 唉, 隊元朗已經人面全非, 今非昔比啦, 都唔係以前果隊元朗了, 以前既元朗係我心目中係好勁架麻, 碩仔啦, 振宇啦, 阿Ken啦, 當然仲有senpai啦... 但自從senpai帶佐佢地上乙組, 唔再做教練之後, 再加上又加佐D新人, 而家隊元朗已經唔再係以前既元朗啦, 而家好似得番個無靈魂既軀殼咁, 黯然失色佐好多了... 好唏噓添. 第二局我諗如果唔係senpai客席做佐陣教練教佢地點攔網, 我諗佢地連第二局都輸埋了... 但第一局比人炒, 真係好肉酸啊~~ 以前既元朗只有炒人既0者, 點會比人炒架!~~ 仲要輸比庭木...

2006年1月2日(一)

今日我地起身就去佐飲茶, 有我鍾意食既流沙包啊, 好好味~ 聽舅父講senpai個表弟撞車入佐醫院, 希望佢早日康復啦. 之後我地就去車站搭車, 過關恐怖又迫人就唔駛講架啦, 總算無驚無險返到香港, 好掛住屋企呀, 好明白咩野叫在家千日好~ 我地係大陸食佐幾日中菜, 返到黎香港即刻去食西餐.

總結呢幾日既中山之旅:
1. 我嘗試佐好多個第一次, 包括第一次坐電單車, 仲要一坐就坐三個人果隻, 真係好鬼驚; 第一次坐BENZ, 真係好鬼豪; 第一次食鹿肉, 好似羊肉咁; 第一次係大陸飲喜酒; 第一次「飲」VSOP; 第一次食青蛙; 第一次係外地過新年...
2. 去親大陸我都盡量飲少D水, 非必要都唔飲, 因為我好怕去果D??, 又臭又污糟, 好恐怖.
3. 大陸D人有錢果D真係可以好有錢, 但諗極唔明點解可以有錢成咁, 我通常既結論就係有錢果D通常都係貪污貪番黎, 否則比著一個普通人, 打份工/做生意又有咩可能可以咁有錢...
4. 呢幾日每日都日食夜食, 餐餐都大魚大肉, 原來都幾辛苦, 所以我呢幾日要食番D清淡D既野~~

2006年1月1日(日) 下篇

今朝係舅母屋企食早餐, 係佢鄉下既食物, 包括有粥啦, ?啦, 有D紅豆係?面既糕點啦, 有D好似扁佐既煎堆又甜甜地既物體啦... 跟住我地就打佐陣麻雀, 然後就出去睇佢阿爸既祖屋, 不過鎖住佐 我地入唔到去, 因為太耐無人住又無人理, 所以係外圍睇都幾殘舊下, 外牆生滿晒植物. 跟住去佐參觀佢堂哥開既製衣廠, 係?面見到有D NIKE, ADDIDAS等等出名牌子既T-SHIRT... 跟住我地再去佢堂哥屋企坐, 佢真係好鬼有錢, 見佢?BENZ已經知道佢唔簡單, 佢間屋仲厲害, 我都唔記得有幾多層, 總之非常之大, D房同洗手間靚到好似酒店咁, 聽講好似用佐二百萬去起, 好有錢呀~

之後我地三點幾先去食飯, 因為之前食佐好多餐大魚大肉, 所以今餐自己話事都叫番D清少少既食物, 我最鍾意食炸饅頭~ 跟住就再返舅父屋企, 然後無幾耐又再出去食飯, 今次我地搭車去到一個好遠既海鮮酒家食晚飯, 有海景, 不過個海黑漆漆其實都睇唔到D咩, 今餐既食物有炸白飯魚, 炸青蛙(佢地話係青蛙而唔係田雞, 但我覺得青蛙同田雞都差唔多0者, 所以都夠膽食), 炒禾蟲(佢地話好好食, 但我見黑??咁, 所以唔敢食), 魚, 蟹, 蒜蓉聖子, 唔知咩野菇, 唔知咩野植物等等, 佢地食飯果陣仲開佐支VSOP, 我試佐一滴, 唔明點解D人會鍾意飲酒...

食完飯我地返舅父屋企繼續打麻雀, 我因為頭先果餐食唔飽, 所以返到舅父屋企都食佐隻香蕉, 今晚我好好運啊, 打麻雀食佐好多舖, 搞到佢舅父話我地殘暴. 最後我地打到凌晨三點幾先訓覺.

2006年1月1日(日) 上篇

06年啦, 新年快樂~ 我祝大家都身體健康, 個個搵大錢, 拍緊拖既快D結婚, 未拍拖既快D搵到自己既另一半.

今年既新年我係中山渡過佐, 因為senpai細妹佢要返大陸擺酒, 我都跟埋上去, 我地12月31日晨早起身出發, 然後經羅湖過關, 再搭兩個半小時既巴士上中山, 去到中山已經成三點半, 我地先去佐佢阿婆屋企坐下, 然後去舅公屋企放低行李, 跟住先去食飯, 今餐飯都好豐富, 有石岐乳鴿, 生蠔, 蝦, 蟹, 咩咩水魚湯, 東坡肉, 通菜煲, 魚, 炒聖子(唔識個字點寫), 美點生果... 跟住就返舅父屋企打麻雀, 然後傍晚就出發去酒樓.

大陸擺酒都幾得意, 黎飲既人唔駛做人情, D人都好早就黎齊, 唔駛等好耐就開席, 但D菜色當然唔及香港咁好啦, 同埋佢地唔似香港咁上完一道菜先一道菜, 佢地係不斷係咁上菜, 所以今餐飯好快就食完. 之後我地返舅公屋企, 因為我好鬼頭痛, 所以食佐兩粒止痛藥就恰著佐, 但因為我堅持要倒數完先沖涼, 所以senpai係06年來臨之前既三分鐘就叫醒佐我, 我就睇住汪阿姐一齊countdown完先去沖涼.