2006年3月28日(二)

某日搭巴士, 我見到坐前面個男人打緊PSP, 無幾耐之後就拎部NDS出黎玩, 我幾佩服佢帶晒兩部機出街囉, 同埋「鄧」佢忙囉, 打完PSP跟手又打NDS. 其實我係想講D人打機係咪已經打到有D病態呢? 我見到有人D痴線到可以係街度一路行一路打, 係咪真係咁好玩咁唔停得手呀? 又有人係車度打, 但就將個VOLUME開到大一大, 慌死人唔知你打緊機咁. 有一次條友係車度打足球GAME, 成程車不斷聽到D吹哨聲, 我真係覺得好煩厭囉~ 好心D人有D公德心得唔得呀?!!! 無理由要成車人陪你一齊打機下話?!! 我覺得打機應該係要黎打發下時間或者要黎玩下輕鬆下, 但係打機打度係街一路行一路打, 或者打到一有時間就即刻拎起部機, 咩都唔做唔訓覺咁去打, 我覺得呢D人真係好問題. 我覺得你花十幾個鐘頭打機, 不如將D時間用係D更實際更有益既地方仲好啦, 例如你可以去進修下, 學下野, 做下運動之類. 講真我同ANATA都會打機, 但會識得分輕重, 唔係打到廢寢忘餐, 或者明明要考試都淨係顧住打機果隻. 不過我知道各人有各人既生活方式既, 同埋好彩我男朋友/老公唔係咁既人就得~~

2006年3月27日(一) 整定還是巧合?

前果排無端端唔見佐條電話繩. 話說有日放佐學搭西鐵返到天水圍, 係天水圍輕鐵站等緊車果陣, 無無聊聊拎個電話出黎睇下有無響過, 見到個電話顯示為:無SIM卡, 幾驚張SIM卡無啦啦壞佐, 因為我以前都試過, 於是即刻拆開個蓋睇下, 原來只係張SIM卡鬆佐, 之後有車黎我就上佐車, 跟手放番個電話落褲袋, 但感覺好似怪怪地咁, 先發覺原來跌佐條電話繩(如果你知T630既設計, 就會知道一開個蓋條電話繩就會跌出黎), 但當我發覺既時候車門已關上, 我望到條電話繩跌佐係我頭先企果個位置度, 旁邊有對情侶.

於是我決定係下個站落車返番轉頭, 點知一落車就見到對面月台走佐架車, 下一班車要等成七分鐘, 於是我就跑返天水圍站, 但係返到去既時候條電話繩已經唔見佐!! 激死我~! 我諗係對倩侶執佐, 如果係天耀站我可以趕到架輕鐵, 咁去到天水圍果陣架輕鐵仲未走, 我就可以認得對情侶問佢地有無執到條電話繩, 可能有機會拎得番架麻!! 而家白跑一場又搵唔返條電話繩, 好唔開心~ 條電話繩係ANATA係日本買架麻, 我好鍾意個DESIGN架~ 都唔明我用佐個電話成兩年幾三年, 從來都未試過鬆SIM卡既, 今次無啦啦又會鬆佐, 我之前明明都無跌過/撞過個電話; 又好衰唔衰 早唔鬆遲唔鬆, 係街先走黎鬆; 如果係屋企/公司鬆, 咁我即使跌電話繩都係跌係自己地方, 仲會執得番麻!!! 激氣!!

其實係我唔見電話繩之前ANATA已經唔見佐佢自己果條MICKEY, 估唔到無幾耐我就唔見佐條MINNIE, 本來佢地係一對架麻~ 估唔到隔佐無耐就相繼唔見佐. ANATA個同事知道之後覺得好浪漫喎, 哈哈, D TIMING又會咁0岩既.

2006年3月26日(日) 全日空

今日難得ANATA全日空無野做, 可以訓到好晏先起身, 之後落樓食下午茶, 然後就睇埋上個星期錄佐既鐵血保鏢. 我覺得呢套劇真係幾好睇, 難得無咩情情塔塔戲又唔婆媽. 我覺得馬浚偉係呢套劇度好型呀, 同埋真係做得好好; 不過佢呢個角色真係非常討好, 一個人任勞任怨專食死貓不斷付出亳無怨言, 對感情又專一又長情, 好似無缺點咁, 呢個世界上會唔會真係有D咁好既人呀? 除非佢唔係人啦~(暫時為止我覺得ANATA都算係任勞任怨不斷付出亳無怨言, 但係咪專一又長情呢方面我就未證實到住啦~~)... 同埋星期五果集好精彩, 佢大哥掟碗果陣好有霸氣, 我終於覺得佢似番個人. 不過好唔明點解會搵姚子羚做女主角? 都唔識做戲既, 同埋唔明阿智究竟鍾意祥鳳D乜野呢? 真係唔明... 不過最唔明都係部死人RECORDER, 明明較佐一至五定時錄影架啦, 點解無端端會無佐星期四果集架?? 都唔知尚正堂點解會死既?

2006年3月25日(六)

今日ANATA一早返佐學校出席乜野教師發展日, 下午就入屯門教波, 我就係屋企溫書. 跟住夜晚約佐振宇佢地打麻雀, 上家顛佐呀, 手風好到痺, 食佐好多舖大牌, 出沖牌又摸唔到, 最後佢嬴佐成千幾蚊走. 好彩我好努力咁力保不失, 最後都嬴佐百四蚊. 最慘係牛丸, 成晚好黑, 最後輸佐千一蚊, 不過今晚玩得好開心~~

2006年3月24日(五)

今日得我地四件去食飯, 去佐仙宮樓食, 我睇飲食男女介紹, 所以提議去呢度食, 我覺得食物就普普通通啦, 但真係有好多外國人黎食喎, 有日本人又有鬼佬.

阿伯話我把口越黎越衰, 其實我覺得係睇下對邊個啦， 講真我係當你好朋友先夠膽疾你唔駛本0者, 知你唔會嬲麻. 而且疾下疾下咪幾開心(我個人覺得0者, 唔知其他人點睇). 講真你識我咁耐, 都知我係無惡意架啦, 純粹開心下0者. 如果你真係介意既同我講哩, 我下次收斂D勒~~ :p

2006年3月20日(一) 終於訂佐酒樓啦~~

因為訂唔到翠亨村, 所以今日放工去佐聘珍樓睇睇, 點知4月8日呢日都一樣係有人落佐訂了, 正當我心灰意冷之際, ANATA話原來4月7日都可以(不過呢日唔夠4月8日好), 佢即刻打電話返屋企問, 4月7日確定佐OK無問題. 原本4月7日都有人HOLD住佐, 但係果對新人過佐限期都未落訂, 所以我地即場落訂, 要佐4月7日呢日. 我同ANATA都好開心, 因為4月7日係星期六, 仲好哩~~ 而家暫定18~20圍, 落佐$9000訂. 咁0岩今日有人擺酒, 我地仲可以睇埋個場既佈置係點樣, 感覺都唔錯, 不過我始終都係覺得細佐少少, 同埋D柱遮住佐幾張?, 但唔緊要啦, 因為我上網睇過新婚生活易果個留言廣場, 聘珍樓既口碑係幾好, 聽講D野係幾好食, 希望到時大家都可以開開心心啦~~

2006年3月19日(日)

今日同ANATA又去婚紗展, 我地終於決定幫襯GLOBAL WEDDING去關島結婚, 而家暫定06年12月27日下午四點係CRYSTAL CHAPEL行禮, 費用$38380(未計high season既附加費, 到時可能係四萬幾蚊埋單), 係EXPO join可以減一千蚊, 同埋送VHS轉DVD, dinner同埋油畫, 都算係咁, 至少好過WEDDING ABROAD, 減得五百蚊又咩都無得送, 又唔包VIDEO, 價錢又貴過人~

婚禮教堂套餐:

酒店接送 Transportation
公証行公証 Notary Public
政府牌照 Marriage License
牧師証婚 Marriage ceremony by minister
租用教堂 Chapel rental
真人彈奏及高音獻唱 Wedding live music
証婚人 Two witnesses
結婚証書 Marriage certificate
新娘花球及新郎襟花 Bouquet & Boutonniere
新娘髮型及化妝 Bridal hair and make up
婚紗及禮服租借各一套 Wedding Gown & Tuxedo Rental
專業攝影 Digital snap (100張連光碟)
所有底片燒CD (jpeg) All netgative return in CD (jpeg)
錄影連影帶 Video taking (edited 30min. video covering chapel ceremony)
專貴相簿連21張相[8x12] Elegant Album with 21(8x12)
雙人直航來回機票及酒店 Round trip air-ticket & Hotel stay accommodation

跟住我地打算睇埋翠亨村訂埋酒席, 因為今朝男家果邊揀到日子, 係07年4月8日, 但係出年4月既酒席都好full下, 4月8日已經有人訂佐添, 所以我地都仲未訂到酒樓, 我覺得好鬼煩呀~ 都唔知點好...

跟住落銅鑼灣拎番隻戒指, 粒石應該唔會再甩出黎啦掛?? 然後返屯門食飯, 現時為止去關島既人數應該有十個人(計埋我地自己), 全部都要老公包埋機票酒店, 好0?利呀~~

2006年3月17日(五) 無得救...

今日放佐工去睇SASA介紹既中醫, 個醫師話我心火盛(唔記得係咪咁既TERM), 重肝火. 拎部機幫我篤耳仔果陣就CHECK到我個胃唔好, 條腰唔好, 膊頭更唔好, 話我份人會好心急, 好緊張, 問我係咪成日發夢(無錯係喎~); 叫我放鬆D, 多D休息... 呢D野講就易, 做就難, 又要返工又要返學就黎又EXAM, 邊有時間休息, 公司同事又狂請假, 仲要一齊請假, 做到人都顛. 我話照過磁力共振證實係軟骨退化, 醫師都話呢樣係先天性問題, 無藥食 無得醫, 叫我做多D運動, 一定要去游水, 無得揀~ 估唔到我要廿幾?人先走黎學游水, 好彩我身邊有個專業教練0者, 否則唔通同D小朋友一齊去上果D游泳班?? 同埋醫師推介我做咩野手法推拿定按摩, 佢話最好一星期做一次, 否則都應該隔星期做一次, 佢話為佐保養, 又係無得揀... 但係我根本忙到唔知搵咩時間去做好, 我諗要到四月先至可以搵時間過去做... 不過呢個醫師好勁咁喎, 出面掛晒各式各樣既證書; 同埋我覺得佢好細心好溫柔好NICE. 果然無介紹錯~~

跟住同ANATA去佐維記食豬潤面, 好味道, 跟住就返屋企勒...

2006年3月15日(三) 當我水魚呀?!

今日上午請佐半日假, 首先我去佐申請智能身份證, 我約佐八點九係天水圍, 去到一個人都無(我當然係指去申請既人), 我諗我可能係今日第一個. 我總共影佐五次, 揀佐第四張相, 但都係麻麻地滿意, 不過費事越影越樣衰, 但我平時個頭係咪唔係成直線既呢? 每一張相個職員都要不停叫我轉過D, 擰過D, 側D... 所以我好鬼怕影呢D咁既証件相.

跟住我就落佐元朗借書, 預約去到17號到期, 所以一定要今日去拎, 否則無時間去. 跟住買佐3蚊腸粉同3蚊魚蛋做早餐, 然後就要搭車返CITYU. 話說因為我之前拎佐個scholarship, 聽日有個scholarship and prize presentation ceremony, 所以今日要返去rehearsal, 過程其實幾無聊, 係聽下簡單briefing, 然後逐個人行一次, 講下D禮儀咁樣. 聽日要formal dressing, 話最好著suits, 但我唔想著suit, 因為我套suit其實而家睇落好老土, 對鞋就更加老土, 所以我聽日可能著第二D唔著suit lu~

下午就趕返公司開工, 跟住夜晚就落佐旺角, 因為今日約佐第一次做彩光, 上到去洗佐面, 然後搽佐D冰涼既野係塊面度, 因為話做彩光會有熱力, 所以要敷D凍既mask上面, 跟住封埋對眼就開始做彩光, 感覺係有D野打落塊面度, 一下一下咁打, 但打落黎果下好鬼光, 光到我心諗:「會唔會盲架?」, 打落黎既感覺係有D熱有D痛, 但呢D同閃光比就真係好小事, D閃光真係好難捱. 成個過程唔係好耐, 感覺上應該打佐幾廿下, 十零廿分鐘左右就做完, 跟住就敷埋個咩鬼彩光mask, 一個鐘頭就搞掂晒走得勒, 好鬼快~

其間佢當然又有sell我野啦, 話如果配合番個彩光面膜就事半功倍喎, 話呢個mask並非一般面膜, 佢可以唔知乜野幫助增生骨膠原, 然後佢篤下計數機, 篤佐個五位數字出黎, 我都唔記得佢話有幾多set, 總之除番12, 一個月都係八百幾蚊喎, 仲要話呢個要係訂番黎, 同埋係彩光師簽佐先可以有呢個「優惠價」, 已經平佐成六千幾蚊喎~ 話下次番黎先買就唔係呢個價. 不知所謂, 我雖然係水魚, 但都唔會咁樣再比你昆落去!!

離開MP17之後去佐SASA, 買ii推介既沐浴露, 我買佐士多啤梨味. 我發覺而家D sales來來去去都係果幾種推銷手法, 包括頭先係MP17佢話, 呢個優惠價只限第一次黎先有架啦, 今次唔買下次再番黎就唔係呢個價架啦(我跟本無諗過番黎喎~!). 同埋係SASA個sales話隻野好好用架, 自己都買佐幾支用緊(你真係有錢啦, 成間公司樣樣產品你都話買佐幾支既?!).

返到去拆開頭先係MP17拎既護膚套裝(個彩光package會送兩套, 我拎佐一套先), 有清潔0者喱, 喚膚精華, 喚膚霜, 滋潤霜同防曬霜, D包裝同印刷好粗製濫造, 好似D大陸貨咁... 佢sell我彩光果陣話做六次就得, 唔好話比我聽做完六次之後話我皮膚本身差所以要做多六次呀?!!! 否則我一定會去投訴架!!! 我塊面無雀斑無暗瘡, 係毛孔大咋喎, 唔好話比我聽六次之後仲要加錢做呀!!

另外要多謝阿SA提供既結婚情報, 我到時有需要的話會煩你的了~~

2006年3月12日(日) 結婚係要付出唔少代價...

今日一朝早出佐旺角既MP17做水晶磨皮, 話說因為早前會展既婚紗展我地落佐疊, 比佐$168做佢話原價要七百幾蚊既水晶磨皮(我就唔信呢個係原價啦~), 我見百幾蚊咁平, 我做次FACIAL都係咁上下啦, 咪去試下囉. 所以就BOOK佐今日做, 但講真如果佢原價七百幾蚊就超唔值啦, 淨係幫你洗佐面, 跟住有支棒係你塊面度磨下磨下咁, 然後敷番個MASK就搞掂啦, 做完之後睇下塊面, 咪好似白佐D囉, 但皮膚好似無咩分別咋喎...

做完之後去簽名, 佢當然就開始SELL我其他野啦, 佢SELL我做彩光, 佢話我面色偏黃, 毛孔粗大, 話做彩光可以減退面色不均, 可以收細毛孔, 總之就皮膚靚靚啦~ 佢話做6次就得, 可以KEEP到十年八年喎, 佢話而家優惠價$15732, 包6次彩光($2760一次, 六次=$16560, 再九五折所以係$15732), 另外仲送多3次水晶磨皮, 2次氧氣噴射再生療程, 1次燕窩補濕療程, 1次DNA基因沖激美療, 一次黑光機(佢講完我都唔記得有咩效用), 另加兩套MP17既護膚品. 我有無落疊?? 緊係有啦~ 否則我點會寫到咁詳細呀... 我見有D朋友幫襯D唔知咩美容院都要萬幾蚊一個彩光COURSE, 咁我諗MP17都好似叫有D名掛?? 結婚真係要付出好大代價, 男家要付出酒席, 禮金禮餅, 過大禮之類既開支; 女方都要付出美容, 修甲, 做SPY, 新娘化?SET頭, 租禮服, 束衣GIRDLE, 頭飾, 首飾, 鞋... 我諗夾夾埋埋都要預幾萬蚊?!

跟住我地去佐九展個結婚節, 果度又細又搵笨, 九成都係台灣婚紗攝影, 都唔係我地需要既野, 我地行唔夠半個鐘就離開, 白白浪費佐$30同寶貴既時間. 好彩後尾係德福撞到ANATA既舊同事, 佢地又係一陣打算去結婚節, 我地即刻比佐兩張飛佢地.

諗諗下而家姊妺團夾埋伴娘有成十個美女, 唔知ANATA搵唔搵到咁多兄弟應付呢? 兄弟人數可唔可以少過姊妹既人數架?

2006年3月8日(三) 婦女節, 女人大晒~~

今日... 又係忙到顛. 3月尾D同事開始放埋D年假. 而其中一個將會陸續不停請假, 因為佢有佐, 要定期去做產前檢查, 佢一放假我就忙到想死.

尋晚返學我又係學校見到死肥仔, 本來佢既位置唔係我經過條路, 如果要同佢打招呼我要轉左, 但其實我係要直去. 其實離遠我已經見到有舊龐然大物熟口熟面, 睇真D原來真係佢. 果刻我諗緊究竟好唔好專登走埋去同佢打招呼, 最後我都行佐埋去, 同佢吹佐幾句水, 佢以前已經肥架啦, 而家越黎越肥, 成隻大灰熊咁, 塊面脹不特止, 條頸差D搵唔到, 總之就係肥仔一件. 真係越諗越唔明以前鍾意佢D乜, 唔怪得人地話愛情係盲目架啦~ 或者你會覺得我而家搵到個咁好既BF, 又就黎結婚啦, 就緊係係度講風涼話啦, 又唔諗下之前失戀果陣喊苦喊忽. 但自從分手一排諗清楚醒覺之後, 真係唔知我鍾意佢D乜, 唔知佢究竟有乜野值得人去愛. 同佢一路吹水果陣, 我一路諗緊好唔好同佢講我就黎結婚呢? 到最後都係無講到, 因為我覺得仲未係適當既時候, 話晒而家距離結婚都仲有成年時間. 呀~~ 又唔記得叫佢還番套漫畫比我呀!! 錢事小, 呢套冷門漫畫係市面上買唔返事大呀!!

2006年3月6日(一)

今日放佐工一齊同ANATA去睇埋其他酒樓, 我地先睇佐聘珍樓, 果度個場幾細, 好似好焗促咁, 感覺麻麻. 但佢既PACKAGE卻唔錯, 包括好多比較實際D既野, 價錢就四千到抆加一另計(即差唔多五千五蚊一圍). 跟住我地去佐北京道一號皇廷酒家, 今日都竟然有人擺酒, 我地於是係門口裝下, 又問下D資料, 但兩個STAFF都有嚴重既鄉音既... 跟住拎佐D酒席資料, 呢間酒樓出年三, 四月既星期六日都差唔多FULL晒咁濟, 原來果度三千幾蚊起又有海景, 咁鬼平唔怪得咁FULL啦. 但我揭下份資料, 原來佢係屬於皇上皇集團架?! 我即刻將本野掉佐落垃圾筒, 呢間完全唔駛諗~

總括而言, 而家我地會考慮既只有美麗華商場既翠亨村, 同埋新太陽廣場既聘珍樓.

2006年3月5日(日)

今日ANATA要去CITYU做大專盃FINAL既球証, 我就一齊跟埋出去, 今日會打四場, 我淨係睇佐第一場--CITYU對IVE, 雖然我係CITYU人, 但我都唔幫CITY, 打得好肉酸, 輸係應該既. 跟住我就落佐去圖書館借書溫習, 因為14號又有MID-TERM, 但淨係睇佐一個CHAPTER, 真係失敗...

夜晚我地落佐西九龍中心既聚滿庭食飯, 咁多間京川滬菜當中, 真係佢呢間最好食~~

我呢個星期終於收到AE寄黎既兩張附屬卡, 一張係用黎儲飛行哩數, 一張係用黎儲積分. 儲飛行哩數果張竟然係NO LIMIT, 如果被人盜用佐既話咁點算?? 但問題係根本都唔多商戶收AE卡既, 幾時先可以碌一次換埋個百佳現金???

今晚都趕得切返去睇佐少少森美小儀主持既15/16, 好似幾好睇咁, 但點解得半個鐘架?? 之後果套咩王子變青蛙, 點解我十一點半轉番過無線都仲做緊架? 呢套垃圾做個半鐘架??

2006年3月4日(六)

今日ANATA要返學校當值, 我就約佐個中學同學係旺角食飯, 佢好鬼鍾意食壽司, 本來佢提議去新開果間北海道活壽司, 不過因為太多人, 於是就轉去佢既飯堂--金太郎食lunch, 果度D壽司碟碟都係十蚊, 如果要求唔高既話, 都算幾鬼抵食. 我同學叫佐個海膽壽司(都係十蚊碟), 我「了」佐一小pat海膽試下, 完全唔得, 係香港食果D我硬係覺得好膠質, 同埋有陣怪(臭)味, 總之就好難食, 好懷念日本食果D海膽無怪味之餘, 佢既味道係甘甜架麻~ 香港果D...

跟住我就去佐柏裕商業中心拎AE卡送既百佳現金?, 鬼死咁多人. 我前面排佐個鬼佬, 我係度睇緊有咩禮品係OUT OF STOCK張告示既時候, 佢突然搭訕問我換既野有無現貨, 問我係咪換AE既禮品. 跟住換完係LIFT口等LIFT, 佢又行埋黎同我傾計, 問我換佐咩, 問我係咪住元朗(佢睇到我信上既地址), 跟住我就同佢傾佐陣, 話佢五千蚊用兩年網上行好貴... 搭完LIFT落到街, 又一齊行佐段路, 佢又問我叫咩名, 係邊度做野, 而家去邊之類; 其實我知道鬼佬性格係幾熱情, 純粹同你傾下計無咩居心, 不過我就有D唔習慣, 始終我對陌生人都抱有少少戒心, 於是我就求其話我要行果邊要過馬路同佢講拜拜, 否則我驚唔知同佢會雞啄幾耐...

跟住我就約佐ANATA去奧海城睇戲, 我揀佐決戰偷心男, 因為我想輕輕鬆鬆笑下, 所以揀佐呢套戲, 真係幾好笑, 尤其是醫院果幕. 跟住我地就落佐廟街食煲仔飯同蠔餅.

2006年3月3日(五)

回應番尋日T君既留言先:
喂, 我既代價咪一早付出佐囉, 你唔好唔記得我經歷過兩次既感情「重創」喎, 我老公都話之前D EX咁對我, 而家係時候有一個真正對我好既人出現~~

醫生都比佐幾套運動我, 要我每晚臨訓前各做30下, 要我強化腹肌同背肌呀~

尋晚阿SIR竟然會派番卷比我地睇, 我仲諗住應該滿分添, 點知得98, 錯佐一題MC, 激死人! 我覺得呢個阿SIR教得幾好架, 可惜佢教埋呢堂就要離開CITYU, 去澳洲讀PhD. 不過班?面D人就唔係太鍾意呢個阿SIR, 因為覺得佢太串, 但我覺得係D人自己?架黎丟0者, 例如阿SIR話明上堂唔可以傾計, 有問題就出聲問佢唔好問其他同學, 如果佢一發現有人傾計, 就會問佢問題, D人掛住傾計緊係聽唔到問題, 答唔出比阿SIR串下都係自己抵死. 好似尋晚咁, 明明前面個女仔係咁傾計, 傾到我都覺得煩, 跟住阿SIR即刻問佢問題, 佢答唔出, 阿SIR就叫佢下次唔好掛住傾計, 個女仔仲要咕嘀話自己無傾計. 仲有就係明明每個星期都要返去做tutorial assignment, 然後下堂一齊對, 但大部份人奉旨都無做, 於是阿SIR就唯有成日比時間D人上堂即場做, ?晒D時間, 我都唔明佢地返黎係做乜架, 最?命係D人連題目都唔識解, 一係就解錯題, 答錯佐仲死賴話條題目寫得唔清楚, 仲夠膽死問阿SIR EXAM有無解釋, 可唔可以帶字典, 係咪有病架?? 你地不如返去惡補下D英文先啦, 不知所謂! 我對住D咁既同學, 真係唔駛溫書都可以A緊啦, 真係頂佢地唔順! (唔好意思, 我覺得D同學實在太有問題, 忍佐好耐, 佢地簡直係0係度浪費我D時間, 所以順便呻下~)

放佐學之後我去天水圍體育館等佢地練完波, 佢地好勤力呀, 而家開始一個星期練兩次, 希望佢地可以KEEP住係乙組, 快D上到甲組啦~~ 睇佢地練波對打都幾好睇幾精彩~ 總之我唔希望再見到好似上次花墟比賽果次咁, 一PAT野, 慘不忍睹...

仲有就係尋日搭西鐵返天水圍竟然撞見阿賢, 都好耐無見佢, 見番D舊同事真係幾開心, 諗番起以前元朗既公司真係幾WARM, 同D同事FRIEND得多, 感情事又傾得, 得閒約下打麻雀, 邊似得而家尖沙咀呢度.... 我諗我係時候又要搞一搞聯誼先得~~

2006年3月2日(四) 好灰...

唉, 我覺得我就黎唔擺得幾耐... 我條腰一向都會痛架啦, 呢個星期痛都仲嚴重, 由朝痛到晚, 我已經盡量lunch食完飯落去行下散下步, 但一坐低就又痛過, 好辛苦, 好想放大假, 因為唔知點解我坐第二D?好地地無痛得咁犀利, 硬係一坐落公司張?就開始痛, 痛到放工. 之前照完磁力共振有結果, check到我脊骨係軟骨退化, 再加上我條脊骨係彎佐少少, 所以都可能是我腰痛的原因. 醫生話而家醫學界都未搵到軟骨退化既原因, 但估計應該係遺傳既問題喎... 呢D問題遺傳到我呢一代算啦, 我成身淨係遺傳佐D差既野, 好既野又遺傳唔到, 所以為佐人類既進化著想, 我覺得我唔生BB係明智既.

除佐腰痛之外, 我隻手(手腕)同個膞頭都好痛啦, 我覺得係職業病啦, 每一日都不停地大量入data, 兩隻手都要成日重覆某個動作. 上星期超級忙, 有日入數入到隻手已經發唔到力, 拳頭都握唔實, 感覺到有D寒意係手腕?面滲出黎咁, 我都唔識形容啦, 總之就好痛啦~~ 咩話, 間唔中要休息下?? 有時忙到飛起恨不得有多幾雙手呀, 忙起上黎我連飲水去toilet既時間都無, 邊有時間休息?!! 我有個同事開始會成日請假, 因為佢有佐要成日去做檢查, 佢放假D野都會PASS比我做. 我真係好想放下大假, 否則日日咁腰痛手痛真係好折磨, 我而家每日返工都要靠撒隆巴斯同安美露做人... 真係好驚遲早會變做因病厭世跳樓既人, 寫寫下呢篇日記真係寫到想喊, 好辛苦...

2006年2月28日(二)

今日簡直忙到痴線, 上個星期三有兩個同事一齊請假, 我負責跟佢地D野, 果日忙到顛佐, 好勉強咁八點幾收到工, 但起碼叫做有時間比我做野; 今日都有同事請假, 我又負責佢既野, 但最慘係今日係2月最後一日, 我地SYSTEM要CLOSING, 所以全部單都一定要係今日五點半之前入起晒, 今日簡直係分秒必爭, 平州既貨已經多, 加埋放假同事平謙既貨, 我LUNCH都差D無時間食, 幾廿百個電話打黎追我入數, 一頭煙. 忙都唔係問題, 我都唔會怨好忙, 反而覺得學下其他同事既野都不錯; 但唔該唔好成日打黎催我啦, 我有既自然會入, 會比你地架啦, 我總不成會做完自己KEEP住唔發出去掛?? 同埋好驚好驚做錯野, 因為最後一日, 如果入錯數既話都無時間做ADJUSTMENT, 所以又要花D時間去對清楚, 一定唔可以出錯. 好彩最後都順順利利完成.

三月都黎緊都仲可以凍到十度, 今晚仲要返學... 但天氣實在太恐怖了, 又大風又大雨, 所以我上完lecture就走佐, 無上tutorial.

今晚返到屋企同阿媽傾佐陣, 我地最終應該決定今年12月27日係關島註冊. 至於擺酒就預計07年3, 4月左右, 但問題係07年通勝未出, 揀唔到日子, 唔知點算. 或者乾脆唔揀, 去到訂酒席時有咩日子揀就揀果日?? 另外阿媽話要十萬禮金同埋十圍酒席, 嫁女餅, 過大禮果D再另計喎... 到最後我會唔會被人撻訂嫁唔出架??

2006年2月26日(日)

今日ANATA仲忙, 帶隊都要走幾場, 我就係屋企做家務, 原來做一個好既家庭主婦真係唔容易, 我今日終於的起心肝做佐好多野, 包括: 換被袋, ?下餐桌, 茶几, 電視櫃, 鞋櫃等等既塵; 執齊雪櫃D擺放位置; 洗?所, 洗手盤, ?鏡; 落樓拎洗完既衫; 去百佳入番D貨... 等等. 本來仲想吸埋塵, 但最後都係無時間做.

今晚我出佐去食飯, 今餐飯食得好開心, 我覺得大家互相疾黎疾去(雖然被疾既對象其實只係得一個)幾開心呀, 我諗唔會有人咁小器嬲掛?? 如果無佐呢D既話, 我覺得餐飯會變得好悶架0番~~