2006年6月25日(日) 軟骨退化無得醫, 睇下我幾時痛到因病厭世...

今日係ANATA學校既畢業禮, ANATA拎佐飛比我去睇. D表演都OK好睇, 最精彩既當然係ANATA負責既體操表演啦, 其次係marching band都幾好睇, 其他都係唱歌, drama, 朗誦之類啦. 不過最最騎呢都係由家教會表演既中文集誦...

表演完佐之後食個飯, ANATA又要趕住去青衣做野, 為黎緊既女排大?賽作綵排, 然後佢夜晚要去黃金海岸飲. 我就自己一個人返屋企, 今日係做家務日, 首先係吸塵. 我唔明點解牆上面成日有D一粒粒一點點既圓形生物係度, size唔係好大, 細細粒細到成粒塵咁, 顏色就啡啡地咁. 其實我發覺佢地係牆度已經好耐架啦, 但又唔知點整走佢地, 我有試過噴殺蟲水, 但好似無效; 用布?就會搞到佢地既屍體一粒粒就黏佐係牆上面. 到今日我先諗到不如用吸塵機吸鬼晒佢地, 吸佐我個幾鐘...

出佐成身汗, D汗直情係一滴滴咁流落黎, 於是我就順便洗埋個toilet然後沖涼. 我"散"佐個浴缸, 洗水盤, 鏡, 換佐塊浴簾, 洗埋個地下... 成個人散晒.

做完家務就溫書, 唔知係咪張椅過高定張木台過矮, 每次坐埋去溫書我都一定會腰骨痛, 仲要痛到行唔到咁濟, 搞到都無心情溫書, 連夜晚果餐都無食, 淨係食個叮叮飯團就算.

今晚明珠台竟然做America's next top models cycle 5 reunion, 冠軍既Nichole靚佐好多呀, 行出黎都充滿自信, 成個人唔同晒. 佢比賽果陣成日話自己由細都大都係被忽略, 無乜人留意既女仔. 唉, 佢生得咁靚又咁cute都話由細到大無咩人留意; 咁我呢挺豬扒咪死係街都唔會有人理?? 黎緊既cycle 6將會係7月16日播映, 咁project runway做完之後都可以有D野「寄託」下...

2006年6月23日(五) 出佐bonus...

呢兩日係toilet同放工搭lift撞到sales dept既兩個女仔, 佢地都不約而同問我:「你係咪resign佐呀?」. 我都愕佐然, 我愕然既原因並唔係連佢地都知我resign, 因為公司咁多八婆是非精再加上一個周圍同人講既白痴老細, 全公司都知我resign都唔奇. 但奇就奇在我本來resign既last day都係五月頭既事, 公司加佐我人工我應承留番係度做, 件事都過佐個幾兩個月啦, 估唔到而家都仲有人問我係咪resign佐. 咩D是非仲未update到咩? 搞到我一時間都唔識點應, 我咪答:「本來係架」...

今日出佐bonus連埋出糧, 但係D bonus都係用黎交學費用, 所以都唔係特別開心.

2006年6月21日(三)

呢個真係唔知咩世界, 一D所謂既補習天王, 年薪原來可以有千幾萬, 即係月薪過百萬. 有無搞錯?? 佢地係咪真係有料呢? 補過佢地既學生係咪真係曉飛呢? 呢班人可以月入百萬, 難為一D真係作育英才, 默默耕耘, 除佐教書又要搞課外活動又要應付家長, 仲要面對各方壓力既教師, 年薪都唔會有過百萬. ANATA你不如唔好教書, 都去做補習天王啦. 究竟呢個現象係社會既錯? 考試制度既錯? 家長既錯? 學校既錯? 定係邊個既錯?

果日同日本人食飯, 同個年紀相近既同事傾開計, 佢問我知唔知邊個係KEVIN KO, 即係補EC果個補習天王, 年薪已經過千萬. 我話我都有補過佢, 不過我果陣係名師果度補佢, 佢果陣都未出名. 然後個同事話, 佢都補過KEVIN KO, 仲要係佢第一代學生, 果陣佢係0係KEVIN KO位於安定既屋企補, 果陣時KEVIN KO都仲未大學畢業. 事隔十年, 佢而家已經過千幾萬年薪. 原來大學出黎最有前途既工作唔係入大公司, 而係入補習社. (不過講真KEVIN KO真係OK既, 解釋得唔錯, 深入淺出. 我repeat果年補過佢, 我A-LEVEL既EC由F變做D) -->(唔係呢科PK EC肥佐的話, 我一早入佐U啦, 我第一次A-LEVEL其他三科拎B, D, E架!!)

另外我最近先知原來KEN係現代教育既老細, 唔係呀化? 我果陣會考都補過佢既英文(KEN & ROGER), 但係條友完全係無料到架, 堂堂淨係識係度吹水, 係度晒佢身上既名牌, 什麼PRADA, D&G, DKNY, 一係就講廢話, presentation skill又唔係好, 我完全學唔到野, 不知所謂!! 但係佢而家已經打跛腳都唔駛憂啦, 某日睇報紙既置業版, 介紹佢間豪宅, 屋企裡面用既全部都係名牌貨, 名師設計既傢俱, 甚至乎?紙都係用LV(我唔記得係咪LV?紙啦, 總之都係名牌啦). 佢簡直係名牌既奴隸!!

2006年6月18日(日) 父親節...

今日ANATA出佐去做球証, 我就朝早起身去剪頭髮, 然後兩點半去做facial. 夜晚我地落佐屯門同ANATA屋企人一齊食飯, 因為幫ANATA慶祝生日, 父親節通街都好多人, MENU又加佐價~ 但係父親節, 對我同ANATA都無咩意義... 我就係夜晚打佐電話過日本比老豆同佢講句父親節快樂.

2006年6月17日(六)

今日ANATA朝早要返學, 下午又要教波, 我就係屋企HEA. 本來約佐T先生食lunch, 後尾佢話要陪女友, 咁算囉; 轉而搵誠誠食飯, 點知佢突然又話要陪父親大人去睇醫生, 所以最後我都係留係屋企上下網打下機就算.

夜晚同阿媽去佐新開既景福宮食韓國燒烤, 即係以前阪門店既舊址. 收費都唔平, 假期要$98位. 食物種類唔算少, 但係就感覺無咩野食, 起碼我覺得好少熱盤. D人又係驚死執輸咁, 一出魚生呀, 壽司呀, 蝦呀之類咁就湧晒出去搶, 排頭位既人仲要變態到差唔多成盤拎走晒咁濟... 唔通元朗既人就係咁? 如果係出面食既話會唔會有D咁既情況出現呢??

2006年6月16日(五)

今晚要同將會過檔SAE既日本人farewell, 去佐夜上海食飯, 果度D野食麻麻地, 但係收得勁貴, 菜單如下(一人份):

花雕醉雞+鎮江肴肉+涼伴海參+十八鮮+青瓜海蜇拌粉皮(一個碟?面有齊咁多野, 每款少少咁)
砂窩雲吞雞煲翅 (D雲吞唔好食)
龍井蝦仁 (細隻到死...)
崧子黃魚 (好細舊)
稻草札肉 (唔知咩黎, 好難食)
金華火腿津白
陽春面 (無咩特別)
蟹粉小籠包 (每人一粒)
香米布甸伴茉莉茶雪糕 (淡淡地但都幾好食)

本來收每位$350, 但好似bargain到$300一位, 另外包一杯飲品(有豆漿, 蔗汁同薏米水揀).

成餐飯既氣氛總算唔錯既, 都係我地自己部門既人食飯, 有17人出席. D日本人總算有講有笑, E先生成日玩我話今日餐飯要由我做翻譯, 我就答佢:「下? 我已經唔明你講咩囉喎~」. 又同日本人講話我識日文(我同果班日本人雖然算同一部門, 但係無工作關係, 我都唔需要同佢地溝通, 所以佢地根本唔知我識唔識日文), 話我已經考佐2級. 於是AKINE就同我講話我D日文應該好上手啦, 考佐2級啦喎~~ 我答佢話:「SONNAKOTO ARIMASEN」. 講真我D日文真係唔記得七, 八成啦, 寫都還可以有七, 八成既, 講就死緊啦!

2006年6月15日(四) 生日快樂!!!

今日係ANATA既生日, 我book佐洲際既SPOON食法國菜, 我叫佐個6-course sexy spoon, ANATA就淨係叫佐個龍蝦main course. 果然係米芝蓮三星級餐廳, 係非常非常好味呀! 仲有無敵海景, 正呀~~


六道菜包括:
蟹肉燉蛋: 好味道, D蛋好滑呀~

帶子: 帶子面頭D配菜同帶子既味道好配合呀, 勁好味.

tasting soup: 分別係牛肉清湯, 蕃茄湯同菠菜湯, 好濃好味道!!

龍蝦肉同pasta: 呢個好好味呀, 正正正!!

主菜sea bass: 要趁熱食先好味.

甜品: 大份D就好勒...


呢個係ANATA叫既龍蝦:

不過最奇怪既事係埋單果陣, 我用?豐Visa卡簽賬(最cheap果張卡), 竟然話我張卡條磁帶過唔到機, 所以碌唔到. 係咪因為間餐廳高級, 所以連部碌卡機都歧視我張cheap卡所以唔肯碌佢? 咁耐以黎我都未試過話碌唔到卡, 到最後都係碌佐張AE, 埋單盛惠$1330~

返到屋企累到死佐, 又好唔聽話咁返到入屋就攤佐係梳化, 死佐~~

2006年6月14日(三)

多謝大家既支持呀, 未有寫comments既讀者要檢討下啦, 哈哈~~

因為聽日係ANATA生日, 所以我今日返佐學. 今日呢堂managing organizational behaviour似乎幾有趣, 最重要係個miss教得生鬼, 人又好啦, 所以覺得D時間過得好易; 唔同星期一上果科management accounting, 簡直想死...

返到去沖完涼上到床都係十一點幾, 但我堅持要等到十二點同ANATA講埋生日快樂先訓覺, 但唔知係咪個人太累定作病, 覺得好頭暈, 又呼吸困難, 好辛苦, 係咪因為仲未習慣返summer呢種地獄式生活呢? 但我已經好爭取時間休息, 連lunch time有幾個字時間都伏係木台度訓下架啦~~

2006年6月13日(二)

嘩, 好感動呀, 突然間多佐comments~~

個雪櫃點解要$300? 因為叫師傅上黎睇睇就要收$300檢查費呀, 如果有零件要換就要再另計呀. 點知原來我地個冰箱根本無壞到, 只係temp control果度較佐去low, 但我地明明無搞過個雪櫃, 唔知點解個冰箱無啦啦唔凍, D雪糕變晒奶昔, 所以我先由high轉去low試一試. 總之就係比個雪櫃激死啦~~ 原來SASA令尊係識整雪櫃架? 咁下次有咩事都問佐你先.

至於關島結婚果度, 唉... 請埋屋企人去大0拿0拿十萬蚊, 本來我地諗住自己兩個去架咋麻, 點知搞搞下搞到十個人去, 本來話包機票酒店only, 但睇怕有好多零碎額外開支都要我地比埋. 過到去又好似無得二人世界, 開支又大佐, 未出發先沮喪...

尋晚又去佐睇比賽, 今次佢地輸佐, 佢地事後檢討傾佐好耐, 搞到九點幾先可以起行去食飯, 今次一行二十人去打邊爐, 任飲任食都係$70位, 又幾抵喎. 振宇搞緊七月二日遊船河, 我要更加keep下fit先得, 否則當天都唔夠膽著背心熱褲/三點式泳衣, 呵呵~~

2006年6月12日(一)

前排走佐好多SALES, 所以呢排請番好多新SALES, 但係近排請果D真係奇形怪狀咩都有, 不過有一個共通點, 就係年紀都好大, 睇個樣應該都成三, 四十?. 以前公司請既SALES通常都係後生仔女廿幾?左右, 但呢期唔知點解請番黎既人年紀都係咁大. 我覺得新黎呢個肯定唔夠三個月就會自己走. 呢度做SALES又無COMISSION分, 有D客甚至乎唔係SALES去跑D單返黎, 係D客求我地SALES接受訂單賣貨比佢地. 係呢度做SALES, 人工又唔高, 後生D既或者都會係度為經驗而捱下既. 係FIT既SALES都唔會留係呢度.

我真係比個雪櫃激死, 明明無搞過佢, 如果唔係我尋晚煮面要係冰箱拎D雞翼同丸丸出黎煮, 我都唔會發覺個冰箱唔凍添啦, 根本之前都無較過咩野溫度, 點會無啦啦因為調高佐溫度所以唔凍架??!!! 唔通屋企有第三個人咩? 定係LULU同PIPI貪玩搞過個雪櫃呀? 咁就唔見佐三百蚊, 激死人!! 呢個月ANATA已經好窮架啦, 一個月內要飲四餐, 咁就唔見佐幾千蚊; 而家部死人雪櫃又係度玩野, 真係麻鬼煩!!

2006年6月10日(六)

今日ANATA下午又要去教波, 我就去做facial. 今日去佐高登打算換con, 佢今次比佐Johnson果隻我試, 仲比多對我番去試多日, 如果OK既就換過盒con. 今次戴呢隻係舒服, 無上次果隻咁"銀"住對眼, 又無上次咁乾. 但係我就覺得好頭暈, 睇野好矇. 唔知係咪我本身副眼鏡比我本身度數多佐成百度, 再加上對con無散光, 所以我覺得睇野都係好辛苦, D字遠小小細粒小小我已經睇唔到, 同埋真係戴得好暈睇野好累, 所以又係戴唔夠兩個鐘就要除番落黎.

我咁樣真係唔係辦法喎, 以前我戴傳統果種都唔會戴到又頭暈又累, 以前我都係照咁全日戴返工都無問題. 我諗緊駛唔駛都係配番D有散光既con, 但要有我咁深度數既散光鏡片就一定要配2-week既先有喎. 價錢當然又再貴D... 都唔知點好~

夜晚落屯門同ANATA屋企人食飯. 搞搞下我真係唔想過關島結婚...

2006年6月9日(五) 黑雨呀~

尋晚係咁行雷閃電又落雨, 訓覺前不斷諗如果聽日黑雨就好了. 點知今日真係黑雨啦, 但係返晒工返晒學十一點幾先走黎黑雨, 又唔走得 咁既黑雨有鬼用咩...

今晚ANATA約佐班同事去諾士佛台飲野, 我放佐工就去join佢地, 雖然佢地都係講教書既野, 我覺得有少少悶, 不過聽下都唔錯呀, 咁其實我又唔鍾意講野既, 鍾意聽人講野多D, 同埋透過佢地既對話可以了解ANATA既工作情況同人事關係多D麻, 都是一件好事呀~

今晚世界杯開鑼, 但係我就無咩興趣去睇...

2006年6月8日(四)

今日上網check成績, 科corporate accounting我都嚇一跳, 係傳聞中既A+呀. 我一直以為A+都只係得個名, 點會真係有tutor會比A+出黎架?! 但我終於有機會拎到A+啦, 好開心呀!! 但係果科Business process design for e-business就炒佐, 得B咋, 比呢科死人野拉低晒個GPA.

我計過自己下星期會好鬼忙, 星期一要返學, 星期二去睇比賽, 星期三返學, 星期四同ANATA慶祝生日, 星期五晚同某日本人farewell食飯.

2006年6月7日(三)

我都唔明, 點解班友仔可以成日都TEA, 明明十二點半都已經lunch架啦, 都唔明班人每日十一點幾都奉旨入pantry嘆茶high tea, 仲要成班圍埋嘻嘻哈哈係?面成粒鐘咁濟. D笑聲大到我個位距離pantry咁遠都可以聽到佢地D爆笑聲. 果班人日日係pantry嘆茶食cake. 然後有人仲可以話自己好忙好多野做, 難為其他人真係忙到斟水去toilet都無時間. 咁又係既, 班PK怕且係忙住嘆茶講是非八卦囉~ (theme theme我都知你係為勢所迫, 唔係話埋你)

我覺得我係呢間公司已經令我變佐好多, 變得越黎越黑人憎. 我覺得自己越黎越憤世嫉俗咁, 對某些PK八婆已經完全唔順眼兼極度討厭, 聽到佢地把聲就覺得好煩厭, 一聽到佢地既低能對話, 心?面就不斷咒罵佢地低能白痴扮晒野又係度晒命巴X閉. 簡直去到個地步就係行過撞見佢地, 當然唔會打招呼, 我有時會忍唔住0貌佢地. 我都唔知點解自己會變成咁, 唉... 我嚴重到有時係街度, 只要前面pair人散步咁行阻住條路, 我就會好?憎, 有時超前佢地既同時會發出"妖", 或者自言自語地話:"阻鬼住晒". 又或者有時行街/迫車有人碰到我或者"high"到我, 我就會好火滾怒睥住佢, 又或者回頭向對方爆粗口. 我以前根本就唔會咁樣, 我覺得而家既我好似無晒修養, 無晒耐性, 無晒容忍度咁. 我唔知點解自己D心態會變到咁樣.

2006年6月5日(一)

今晚要返學. 由於上星期返學我捱到九點過後已經頂唔順, 好眼訓咩都聽唔入腦, 所以今日做足準備, 首先係公司拎佐D零食返學, 然後再去Pacific Coffee買佐杯凍朱古力咖啡(好慳用$6.5買個面包當晚餐, 但係就用佐$30買coffee...). 結果我真係可以好專心咁捱到放學無恰眼訓.

2006年6月3日(六) 試佐妝啦~~

今日約佐試妝, 試佐三個鐘, 總共試佐三個妝四個髮型, 我比較鍾意第二同第四個造型~~ 我都有自知之明, 我都唔要求要化得我好靚, 因為我知就算點化我都唔會叫做靚, 我只要求唔好太豬扒樣都已經OK啦. 辛苦晒ANATA同細妹呆等佐三個鐘陪我試妝.

試完妝我地落尖沙咀太子酒店食tea buffet, 然後去打佐陣機, 跟住去睇達文西密碼. 節目很豐富的一天.

但是今天的問題是副CON好唔掂, 我只是戴佐幾個鐘, 已經覺得很辛苦, 覺得對眼好"澀", 戴佐幾個鐘已經覺得對眼好累. 頂唔順去到太子酒店0拿0拿臨入toilet除佐副CON(好彩我都醒目帶埋副眼鏡出黎). 我個妹話照計眼鏡舖會比幾隻唔對牌子及唔同弧度既CON比你試, 而且會叫你戴住半個鐘出去行去試下有無問題. 但我去高登配, 竟然無比幾隻唔同牌子我試, 同埋我戴上一陣再驗下眼無耐佢就叫我除番落黎, 都無半個鐘, 又無比我揀牌子同價錢. 同埋我返去睇清楚我盒CON既牌子, 竟然唔係1-DAY ACUVUE, 係唔知乜鬼野牌子!?

試妝相-第一個造型

(如看不到相片, 可以right click, 然後選擇"顯示圖片")

妝是淡妝, 淺綠色眼影, 不是太粗的眼線, 沒有黐假眼睫毛.髮型是兩邊留少少頭髮下來.

試妝相-第二個造型

第二個造型: 濃妝, 紫色眼影, 粗眼線, 黐佐假眼睫毛. 髮型是淨係右邊dum少少頭髮落黎.

第三個造型

第三個造型: 化妝同第二個造型一樣. 髮型是後面dum好多頭髮落黎, 前面D陰有夾住少少.

試妝相-第四個造型

第四個造型: 著褂既造型, 好似係紅色眼影, 都係粗眼線同有假眼睫毛. 髮型是鬢辮束起, 有少少毛仔dum落黎.

2006年6月2日(五)

今日仍然好想食壽司, 本來諗唔到去邊就諗住近近地去元祿, 但原來已經執佐. 於是改去和花庭食, 因為之前聽人講果度好好食好正. 我覺得都OK既, 起碼D壽司應該唔係機器"bear"出黎四四方方一舊飯, 似乎應該是人手造吧...?

睇15/16, 話鹿茸最有功效既部份係頂部. 我兩年前去廣西旅行都參觀過梅花鹿場, 我明明記得當時介紹話最有效用是剛剛新長出來的地方, 而新長出來的地方就是底部, 所以底部是最有效的, 叫我地如果買就唔好買頂部. 但15/16的答案卻是頂部. 那即是說我去旅行參觀時的介紹是假的~!!!? 騙我們說底部最有功效, 然後就sell我地買D最無功效既底部啦?!!!! 很賤呀! (當然我那時什麼都沒有買)

2006年6月1日(四)

EXTRA新出果隻哈蜜瓜味好正, 不過味道太淡, 0趙兩下就已經無乜味...

我公司每個月尾都會買D蛋糕西餅返黎, 當係birthday cake. 我都唔明, 個個月都有得食, 又個個月都係買果幾款蛋糕架啦, 但當一call mic叫"please enjoy the birthday cake"無耐, D人就一窩蜂咁衝入去(有D仲係跑入去)pantry拎蛋糕, 慌死蝕底咁, 個情況何其壯觀呀~! 其實D蛋糕個個月都有食剩架啦, 真係唔明點解要慌死執輸咁跑入去. 我係度做佐年半, 計埋我都唔知有無食過五次, 即使係我生日月份我都無入去拎蛋糕食.

放佐工我即刻走, 因為趕住七點半返到去電腦面前等add-drop, 今晚ANATA要去飲, 我就失驚無神想食壽司, 於是見返到元朗仲有少少時間, 係東頭村個站落車行去新元中百佳廣場, 0拿0拿臨買完又搭巴士返去, 返到去七點五左右, 好彩今次都可以成功add到想要既科. add完科之後就落街拎衫, 然後先返屋企食野. 食完野不斷上網繼續搵新娘化?同髮型相, 睇到十一點幾頂唔順實在太眼訓, 於是就好乖咁去訓覺勒.

2006年5月31日(三)

今日放假, 下午去佐屯門同ANATA屋企人飲茶, 然後上佐佢細妹屋企打麻雀, 嬴佐二百蚊好開心. 跟住ANATA要落天水圍做球証, 我就去佐元朗高登拎CON, 順便學戴同學除. 跟住又去百佳入佐好多貨...

2006年5月30日(二)

KAKA估中佐, 答案就係"佢地大家都唔熟".

我終於印佐新卡片(當然係我自己要求印), 雖然都無咩機會派, 但都應該印定以備不時之需麻.

今日同中學同學去又一城既又一泰食飯. 果度D野樣樣細細碟, 完全唔抵食, 我唔會建議大家去幫襯囉~ 由於大家都食唔飽既關係, 所以就提議去食糖水, 最後去佐深水PO松記糖水食, 我例牌又係食幻彩明珠, 但十五蚊真係好抵麻.