地址: 尖沙咀海港城海運大廈LCX第2層
電話: 3102-0375
上星期日約佐大學同學黎呢度食飯, 由於十月係我做搞手, 所以呢度都係我揀既. 我地張枱係窗口位, 對住個海, 好正. 我地四個人叫佐個雞肉餃子, 一個辣肉腸pizza, 同一個墨西哥雞肉菠菜闊面, 仲有一樣野唔記得佢叫咩名. 個雞肉餃子OK啦, 辣肉腸pizza麻麻地, 個菠菜面味道怪怪地, 雞肉份量好少, 但都幾好食. 後尾見大家好似唔多夠食, 我提議叫甜品, 我地叫佐個brownie, 同埋一個唔知咩朱古力餅. 去親美國餐廳我一定叫brownie架啦, 呢度既brownie好好食喎, 好食過Friday, 好正~!!
是次每人消費約$96
地址: 元朗教育路大坑渠側
電話: 2473-3148
食完飯我地去佐舊B仔食糖水, 我同流沙包叫佐個B仔船, 有香蕉, 西瓜, 哈蜜瓜, 大樹菠蘿, 椰果, 桃, 同埋雪糕球. 無咩特別, 出面既糖水越黎越出色, 變相B仔就已經無咩特別啦~ 以前都仲會聽講有人專登揸車入黎食B仔, 我諗而家應該唔會架啦? 比我有車我調番轉出松記好過~~
是次每人消費約$20
地址: 元朗馬田路80號御庭居商場1號舖
電話: 2442-4887
上星期六流沙包帶完隊返黎落去食tea, 費事行咁遠所以近近地落樓下美麗都, 我叫佐個日式豬軟骨拉面, 流沙包睇錯menu叫佐個炸雞翼沙律. 豬軟骨拉面幾好食, 個湯底好得, 掂過果D真係賣拉面既日本料理, 好食! 雞翼沙律既雞翼炸得好脆, 同埋醃得好入味, 我覺得隻雞翼好重豉油味. 其實美麗都D野係幾掂, 不過我份人貪新鮮又鍾意試新野, 所以而家都好少落黎食.
是次每人消費約$28
地址: 銅鑼灣駱克道463-483號銅鑼灣廣場二期9樓
電話: 2882-8770
上星期五放工後要去銅鑼灣覆診, 之後去佐Baby Blue Cafe食飯. 其實係舊舖果陣去過一次, 之後一直都想搵機會再去, 但直至佢執佐都無再去過. 後黎佢係銅鑼灣廣場重開, 所以今次難得同流沙包黎銅鑼灣, 諗都唔駛諗就決定黎呢度食飯.
先講環境, 比以前差佐囉, 印象中以前既佈置同氣氛都似係高級餐廳feel, 但而家就係普通餐廳feel, 同埋個場好黑, 睇menu睇得好辛苦, 我見隔離枱甚至乎要拎住個電筒照住個menu睇.
食物方面佢好多選擇, D配搭都幾好, 我地叫佐個二人套餐C, 可以揀四個頭盤, 兩個湯, 三個主菜, 兩個甜品, 包兩杯餐飲, 都好似只係$358. 頭盤我地叫佐鵝肝, 芝士藍貝, 蟹肉果凍, 同一個唔知咩酥盒. 湯我地叫佐南瓜忌廉同龍蝦湯. 主菜我地叫佐墨魚汁飯, 燒春雞同煎魚(唔記得咩魚). 甜品我地叫佐心太軟同荔枝雪芭.
鵝肝--雖然係好細舊, 但係煎得剛剛好, 唔會太熟, 好好味
芝士藍貝--都唔錯, 幾好食
蟹肉果凍--佢賣相幾靚, 味道都唔錯
酥盒--好細個, 雖然鹹佐少少, 但都係好好味
南瓜湯--淡佐少少, 味道OK
龍蝦湯--正如waiter所講, 真係好鬼濃味, 但流沙包話啱佢口味, 我就唔多接受到
墨魚飯--好好味, 但食完成個咀黑晒, 要抺好耐
燒春雞--唔好以為係成隻呀, 係一舊仔咋, 味道麻麻, D肉唔多滑
煎魚--OK
心太軟--都好食, 但唔夠熱, 同埋穿佐既?? 特色黎架?
荔枝雪芭--好味
總括黎講, 咁既價錢試到咁多野, 都幾抵啦. 不過佢上菜太慢, 等到眼訓, 我食完飯仲要趕住去行街架麻...
是次每人消費約$200
地址: 尖沙咀堪富利士道12號宏貿發展大廈3樓
電話: 2730-9131
上星期日晚同流沙包出佐尖沙咀食飯, 因為流沙包剛剛入佐Marco Polo既Privilege Club, 有一張食中菜一圍既唔知咩coupon, 於是流沙包就約埋班同事一齊黎食, 菜式如下:
荷葉花彫籠仔蒸生蝦 -- OK啦.
桂花瑤柱炒魚肚 -- 幾好食喎, 好特別.
蜜豆花枝帶子 -- 唔錯, 帶子大粒彈牙.
鮑參肚翅羮 -- 好淡好稀...
清蒸大海青斑 -- 條魚好靭...
古法羊腩煲 -- OK, 唔太羶.
薑蔥焗蟹 -- 呢個好味, 但份量好少...
福滿出位豉油雞 -- OK.
瑤柱蛋白炒飯 -- OK.
上湯雲吞 -- 難食, 感覺裏面D肉好霉...
美點雙輝 -- 甜品好食, 係芒果布甸, 同埋類似老波餅, 但裏面有奶皇既酥, 好味~
合時甜品 -- 紅豆沙, 好唔掂, 食佐兩啖就放低佐...
生果拼盆 -- 西瓜同哈蜜瓜.
無咩特別, 服務都OK既, 但個toilet勁細...
是次每人消費約$210
地址: 元朗大馬路212號華昌樓地下D舖
電話: 2479-8033
上星期六晚黎佐呢度食飯, 今次係第二次黎食, 我叫佐個餃子紅燒肉手拉面, 流沙包叫佐個餃子鹵肉刀削面. 講真我覺得呢度D面麻麻, 餃子唔太好食, 紅燒肉都唔好食. 搞到我好懷念巴士總站果間北京水餃店...
是次每人消費約$29
地址: 元朗體育路8號地下
電話: 2474-6828
上星期六同流沙包黎呢度食tea, 其實選擇有好多, 照計應該好容易揀, 但諗起自己要節食, 以前我必叫既雞髀薯條唔叫得; 見到個奄列拼薯條都好吸引喎, 但薯條太heavy, 又唔叫得... 睇黎睇去都唔知食咩好, 嗚~~~ 最後叫佐個黑椒肉片炒意粉, 流沙包叫佐個腸仔煎蛋熱香餅(好早餐feel). 個黑椒肉片意粉比想像中好食好多喎, 即炒熱辣辣又夠鑊氣, 味道又剛剛好, D意粉又炒得幾入味, 唔會一D太鹹一D太淡一D無色, 佢炒得好平均. 呢度既意粉真係幾出色幾好食, 上次lunch黎食意粉都係水準不俗. 以前覺得呢度係"up dup"餐廳D野唔慌好食, 但從此我會改觀, 因為D意粉真係好得~~
是次每人消費約$22
今日去拎body check report, 專登揀星期五去因為去完唔駛返公司. 我本來約佐四點鐘, 但做唔晒D野, 搞到四點四先去到醫療中心. 都唔知搞咩一等就等佐成九個字先可以入去睇report, 果陣又唔係多人... 入到去見醫生, 佢都算有講解下, 但係我呢D普通凡人, 佢講完一輪我都未必明佢講緊咩. 佢劈頭第一樣野就問我有無聽過地中海貧血症, 呢個我當然聽過, 因為之前次次body check醫生都話我可能有呢個地中海貧血症, 今次呢個醫生話睇完我個blood report, 所有數據都完全係地中海貧血症既徵狀, 佢話我九成都似係, 但當然如果真係要confirm要再抽一次血再驗啦~ 我就無再驗, 因為我都唔諗住生BB, 有同無都無咩所謂啦; 二來如果真係要做, 都應該搵埋流沙包一齊做, 睇下我地兩個人係咪都係基因帶有者, 係既話就真係想生都唔應該生了...
另外醫生話我乙形肝炎既抗體低佐喎, 理想既應該要有100以上, 我就得番三十幾, 佢話最好補一針, 是但啦, 反正我支肝炎針係成五年前打既, 都應該係時候加強番掛? 盛惠$250.
今晚食完飯行佐陣朗豪坊, 買佐條好可愛既Keroppi泳褲仔, 同埋買佐套結婚用既粉紅色Mickey Mouse睡衣~
地址: 旺角朗豪坊13樓
電話: 3514-4227
上星期五晚流沙包做完body check餓佐成日話要食扒, 於是我地去佐朗豪坊睇睇, 最後揀佐呢間, 流沙包叫佐個肉眼扒, 我就淨係要佐個田螺薯茸, 因為一來lunch食得太飽都未肚餓, 二來我要認真咁on diet. 我唔食牛所以唔知流沙包個扒得唔得, 個田螺就普普通通啦, D薯茸好少... 我地仲叫佐個火焰雪山添, 但係好唔掂, 大家千祈唔好試, D cream成尺厚, 挖極都見唔到裏面D雪糕, 同埋佢唔知用D咩牌子既雪糕呢? 我感覺佢似係牛奶公司雪糕囉~(但流沙包話應該唔係), 總言之就係難食...
是次每人消費約$120
地址: 尖沙咀亞士厘道21號A地下
電話: 23665262
上星期五同Kaka一齊食lunch, 大家都無咩idea, 於是決定去佐亞士厘道再決定食咩, 我都無咩心水於是求其入佐黎, 諗住試下新野. 點知入到去坐低先記得已經黎過, 我上次黎完仲同自己講下次唔會再黎添, 但入到黎唔通起身走咩, 於是即管睇下呢間野有無改善啦. 我叫佐個雞扒燒汁飯(呢度無得配薯菜真係老土), Kaka要佐個冬陰公海鮮米線. 我個雞扒飯無咩特別囉, 但問題係四十蚊食個咁既雞扒飯我駛鬼黎呢度食咩, 我落樓下大家樂買好過啦, 更何況我lunch都唔會揀大家樂添啦... 唯一可取少少既係呢度既餐飲有少少特別囉, 可以揀蘋果紅茶同桃紅茶, 佢杯茶真係落佐D蘋果粒同桃肉粒係裏面架喎~ 除佐杯茶之外, 其他方面唔多掂囉...
我感覺到呢間餐廳係有heart既, 但係... 見佢lunch時間都坐唔滿, 我同自己講記得記得下次唔會再黎.
是次每人消費約$40
地址: 元朗教育路71-79號地下
電話: 2474-7874
上星期二試完衫打算去許願樹食飯, 點知經過田中見到竟然無人等位, 仲見到裏面有吉位添喎?! 於是流沙包就提議去田中食飯, 我見反正田中咁難得無人等位, 於是我就犠牲我既心太軟改去食日本料理啦~ 入到去流沙包話因為早前田中被人驗到D鰻魚有孔雀石綠, 唔通係呢個原因, 所以平時大排長龍既田中今日竟然唔駛等位? 我地叫佐個帶子拼甜蝦刺身, 螺肉, 炸蠔卷, 餃子雞翼, 薑汁雞肉炒飯, 海鮮拉面. 味道就普普通通啦, 一向以黎我都唔覺得田中有咩咁特別好食(當然我既思意唔係話佢難食, 只係唔明點解硬係咁多人等位), 但我覺得佢好在咩都即叫即整, 出黎果陣都係熱辣辣.
是次每人消費約$80
交通工具上:
1. 講電話講到大大聲.
2. 坐你隔離位果個由上車講電話講到落車, 但講埋D內容又無無聊聊, 搞到你想訓下都唔得.
3. 用電子產品聽歌唔用HEADPHONE, 而係大大聲就咁播出黎, 成個車箱都聽到, 當正係自己屋企咁.
4. 係車箱度打機(PSP, NDS或者手機)將個VOLUME開到鬼咁大聲, 成車人都知你打緊機, D聲令人煩厭.
5. 搭地鐵, 西鐵, 輕鐵既時候一打開門就搏命衝入車廂, 都唔等裏面D人出佐黎先, 慌死霸唔到位坐少陣會死咁. 尤其是指揮自己D仔女衝入車廂霸位果D師奶, 知唔知咩叫做家教??
6. 明知人多又迫仲要成個人挨落條柱度, 搞到其他人無位扶手.
7. 坐巴士果陣後面條友係咁用膝頭頂住自己張櫈.
8. 返工時間帶埋D好大味既早餐上車食, 食完又唔帶埋D垃圾走, 就咁掉落地下/攝係櫈側邊, 無家教.
9. 趁人迫搏矇非禮既死鹹蟲!!
10. 明知自己病又唔帶口罩, 係狹小既車箱裏面狂咳, 個鼻又狂嘶嘶嗦嗦, 係度散播病菌令人煩厭.
星期二請佐半日假去試衫(擺酒果晚既婚紗同晚裝), 咁啱個妹又有補假, 加埋流沙包, 有多兩對眼幫下眼比意見. 我大大話話都試佐十幾廿套, 我第一次試著呢D晚裝同婚紗, 但覺得自己著得唔好睇, 一來我膚色又黑, 著唔到好淺色既衫, 會顯得我仲黑. 二來我A字膊, 著low cut真係無人地著得咁靚. 三來我手臂肥, 虎背熊腰咁, 即使件衫靚自己都著得唔靚. 我真係一定要好努力減肥先得, 因為個sales幫我著girdle果陣, 佢問我係咪有佐喎~ 嗚嗚, 我係有肚腩, 但比人誤會我有佐, 真係好hurt呀, 嗚嗚~~ 然後我換佐晚裝出黎照鏡, sales話估唔到我都有D肉地, 因為佢話見我平時衣衫覺得我好瘦, 但換完D晚裝出黎, 無遮無掩之後, 佢就覺得我原來都幾肉地. 嗚嗚, 我自己都咁覺得, 兩條手臂好似節瓜咁, 好肥呀~~~
最後暫時hold佐兩套婚紗(會二揀一), 一件金色晚裝, 一件紅色, 一件桃紅色, 一件牛仔布晚裝. 因為果度唔比影相, 所以無相可以post係呢度囉. 但我終於知道點解佢地唔比人影相, 因為我見佢地D衫都係抄人地款黎造, 所以可能係呢個原因所以唔比人影相掛...?
呢排駛一個幾亳都要計過度過, 因為唔想去到入不敷支既地步(但其實已經入不敷支緊, 好彩早幾個月好慳咁儲到兩萬幾流動資金, 而家係駛緊D積蓄). 呢排個個月都要找成萬蚊卡數, 黎緊又要交萬四蚊學貴, 所以最近都開始好婆仔咁每逢返學日就去嘟地鐵價惠機可以平兩蚊搭地鐵. 平時放學攰到死會係西鐵站搭的士返屋企, 而家就算攰緊都要行路躝番去. 我諗係結婚前都要繼續呢種死慳死抵既生活.
不過前幾日收到稅局封信, 第一次收到稅局既信係咁令人振奮, 因為我終於上訴成功, revise番個人進修開支, 而家可以交少二千幾蚊稅, 開心死~~
今朝早出佐去做facial, 間DR SPA(即係果間MP17)都痴痴地, 差唔多次次上去都sell我野, 上次比佢地呃佐做彩光做佐四次都無效果, 我投訴完一輪後佢幫我將剩低既plan轉佐做其他野, 當然其中我都有再補錢啦, 而家轉佐做jet peel既plan. 餐餐上到去都sell我野, 上次去就sell我買什麼凹凸洞精華, 千幾蚊一樽仔, 話收毛孔勁掂, 係咁sell我買package話好抵只係萬幾蚊有唔知幾多set再送facial, 我當然唔買啦. 今次上到去就唔知sell我做咩鬼野新機, 又係話收毛孔勁掂, 一次見效, 原價五千幾一次, 而家買一送一只係二千幾做一次, 痴痴地, 即使我信你真係咁有效, 我廿幾歳人就走去做呢D五千幾蚊既facial, 咁我再老D既時候要做咩facial先得呀?? 再講我根本唔會再信你大話連篇, 當初你地sell我做彩光咪又係講到天上有地下無要幾勁有幾勁, 到最後皮膚咪又係一D改善都無!!! 幾千蚊做次facial我寧願將D錢買晒做燕窩食好過啦, 你都發神經既!!
夜晚就出去飲, 地點係荃灣好彩, 十一點幾飲完入元朗join流沙包佢地, 佢地係Green Box唱K(但點解唔去Neway呢?), 我又唔唱歌又唔飲酒, 於是坐到兩點左右就自己搭的士返屋企先, 返到屋企諗住一路睇錄低佐既電視一路等流沙包返黎, 後尾捱到四點幾頂唔順訓著佐~
今年既中秋節好無意思, 假期係正星期六, 我一向都係返五日都唔駛返星期六架啦, 變相蝕佐一日假期. 星期五大部份公司都有得放四點, 個個MSN都話四點走得同我講拜拜, 我就無得放早照收五點半. Kaka話鬼叫係日本公司咩~ 但我覺得日本公司又點啫, 日本放假又唔見我地有得跟住放?? 中秋節都唔比人早走, 有假期又等於無假期, 好唔抵呀~!!
放佐工同流沙包落屯門做節食飯, 食完飯就返屋企, 好悶呀~~ 鬼叫要溫書咩, 13號要交功課, 都唔識做, 死緊啦~~ 邊位會計高人可以幫下我呀?? 
地址: 元朗鳳翔街交通廣場38號地舖
電話: 2478-6363
上星期三晚去佐呢度做節食飯, 本來最初打算去元朗廣場新開果間潮館, 但老鬼土得兩個時段可以book, 一係就六點三, 一係就八點半, 八點半時段就已經full晒喎, 痴鬼線定埋D咁既book枱時段, 一D彈性都無, 有寶呀~?! 我想食七點半咁點呀? 六點三正常既邊有咁早放工返到入元朗呀?? 即使八點半未full唔通我成村人等到你八點半呀?!! 於是轉佐黎滿淮庭. 我地叫佐八樣野:
小籠包 -- 一籠有五粒喎, 剛剛我地有五個人, 啱晒~ 味道都唔錯.
三杯蠔 -- 唔錯, 蠔既數目都應該有十隻八隻掛?? size唔算好大, 但味道都OK, 上菜時滾熱辣.
醉乳鴿 -- 幾特別, 醉雞食得多, 醉鴿真係未試過, 阿媽都話好食, 不過因為係乳鴿, 所以好細隻唔夠食~~
紅油水餃 -- 係紅油抄手既變化, 不過味道普普通通, 無咩特別. 
小白菜炒什菇 -- 好味道, 比預期好食, 成碟清晒~~
樟茶鴨 -- 我都係第一次食樟茶鴨, 應該係咩野味道我唔係好清楚, 但我覺得一來份量太少, 二來好多舊都係骨無咩肉食, 三來隻鴨好肥, 有幾舊成舊都係皮同肥膏都無咩肉食, 四來好鹹. 我覺得唔係太好食. 
蝦子海參石頭飯 -- 呢個好好食, 熱辣辣, 味道唔錯, 好快就清晒, 我想「筆」多碗已經無晒.
蔥爆鰂魚 -- 呢味菜係waitress介紹既, 條魚等佐好耐先上, 我唔係好明點解佢會推介呢隻魚, 係咪好多日都賣唔出呢? 好多骨囉, 我都食唔慣淡水魚... 不過味道都幾好. 
本來想試呢度既手撕雞, 好似係招牌菜咁, 我見枱枱客都叫, 但點知已經賣晒, 下次要再黎試下佢既手撕雞~~
是次每人消費約$100
元朗教育路9-13號興發大廈地下7號
星期一晚流沙包踩單車出佐海皇粥店買外賣返黎, 本來諗住叫生滾粥要豬潤同豬肉丸, 點知無豬潤喎, 咁是但要番個皮蛋瘦肉粥算數, 要多個炸両添; 流沙包就叫佐艇仔粥同豉油炒面. 我個皮蛋瘦肉粥都算足料, 有好多皮蛋係裏面. 個炸両可能「淋」佐, 所以麻麻地.
間唔中食粥清下腸胃都唔錯架~
地址: 元朗康景街利景樓5號地下
電話: 2476-6882
星期一同流沙包去佐嘉麗園食tea, 聽講呢間野好出名, 而且咩時候都鬼咁多人, 諗住去試下啦, 我叫佐碗十寶河粉, 流沙包要佐碗水餃米. 十寶即係有十種唔同既丸同餃係裏面, 我數得出既有雲吞, 水餃, 魚皮餃, 豬肉丸, 扎肉丸, 兩款牛丸, 墨魚丸, 白魚蛋, 仲有一款我都唔記得, 另外仲有紫菜添. 但我覺得都唔係特別好食啫, 又唔係特別大粒, 講真$26一碗我覺得貴囉.
講真下次唔會再黎, 一來坐到鬼咁迫, 要七個人迫埋一張枱, 我隔離果個仲係肥師奶, 我又左手揸筷子喎, 食到我鬼死咁辛苦. 而且佢果度既衞生差到痺, 滿地都係垃圾同伙記落單果D紙仔, 執枱D阿姐佢唔係執枱架, 佢係將枱面上既垃圾同食物殘渣全部撥落地下架咋, 好恐怖呀~~ 都唔明點解會咁多人黎幫襯架!!
是次每人消費約$25
國慶日流沙包好有興致咁入佐大嶼山銀礦灣參加沙排比賽, 我本來就諗住係屋企繼續閉關溫書, 傍晚流沙包打黎話元朗佢地今晚會去BBQ, 然後上振宇度打麻雀, 於是我就係屋企一路溫書一路等流沙包比完賽返入黎元朗. 結婚我地九點鐘先去到西鐵燒烤樂園, 呢個係新既燒烤場, 星期六先剛剛開張, $68位, 但係D食物唔得囉, 食物種類少, 得D好普通既腸仔, 紅腸, 丸丸(味道仲要麻麻), 雞豬牛扒雞翼(醃得麻麻), 金沙骨, 多春魚, 同埋有粟米, 方包同D茄子青椒. 飲品就每人包一支水一罐汽水或啤酒, 汽水又無得揀得百事. 炭就每個爐包兩包only, 唔夠用就要買, $15一包. 振宇佢話而家全元朗屯門都係做緊$68, 人地都不知幾多野食, 所以結論係呢個燒烤場完全唔得.
不過呢度有個無敵大銀幕可以睇波, 都總算有D賣點啦...
是次每人消費約$68
十一點幾燒完就上振宇屋企打麻雀, 今晚手風麻麻, 但都總算嬴百幾蚊, 但實際落袋既只有三十幾蚊, 因為輸家輸到唔夠錢比. 我凌晨四點打完八圈麻雀諗住返屋企, 但隔離枱玩緊一種好似叫「雀九」既遊戲, 玩都個個鬼咁投入, 然後又轉玩啤牌廿一點, 玩到天光六點幾先走. 本來大家話去飲埋早茶添, 但係早茶要七點先有得飲, 太眼訓所以大家都返屋企訓覺.
地址: 元朗同樂街32號金寶大廈地下5號舖
電話: 2479-2555
星期六晚同流沙包去佐北京水餃店食dinner, 我叫佐個担担排骨面, 流沙包叫佐個担担水餃面+豆漿既set, 再加個小籠包. 呢度D担担面果然好味, 排骨又夠腍夠入味, 勁好食. 不過個小籠包就唔得lu, 皮厚又蒸佐好耐, 而且裏面都無汁既, 唔合格, 價錢平($12)都唔會再試.
是次每人消費約$30
食完飯我地去冒險樂園拎雪糕月餅, 順便玩佐陣掟彩虹, 我地攞佐一百個coin掟, 今日戰績麻麻, 淨係中到紅色, 結果拎佐九包小食走. 但今次對決我以3比6輸佐比流沙包...
地址: 元朗教育路
星期六同流沙包去佐紅蕃茄食tea, 我叫佐個雞絲湯水晶粉, 流沙包淨係叫佐個韮菜餃. 我個雞絲湯水晶粉好好味, 蕃茄湯好好飲, 又有好多番茄同薯仔, 好味!!
是次每人消費約$25
地址: 旺角雅蘭中心2期地庫(山東街入)
電話: 2628-0266
星期五晚去完教協我地去佐雅蘭既避風塘食飯, 等佐一陣先有位. 我地叫佐個艇醬A菜, 辣酒煮翡翠螺, 櫻花蝦肉臊飯同埋避風塘雞翼尖. 徇眾要求(其實只係獨食王提過), 終於都有相睇啦~~~
艇醬A菜--勁好味, D菜用類似韓國料理食石頭飯既BOWL黎裝, 熱辣辣, 又唔怕好快會變凍. D醬真係好好味, 成個菜勁好食!
辣酒煮翡翠螺--味道唔錯, 唔會太辣, 但我嫌佢唔太熱. 
櫻花蝦肉燥飯--我覺得味道怪怪地, 但唔係唔好食, 不過唔知櫻花蝦即係乜, 係咪即係蝦米呢? 我見唔到有蝦肉既...?
避風塘雞翼尖--味道淡佐D...
整體黎講真係好好食, 我一定會再黎, 不過下次黎一定要坐房, 有梳化坐得舒服好多. 佢出面枱D死人櫈, 背脊無得挨但又整條木係後面, 我一坐落去就腰骨痛, 淨係想快D食完餐飯快D離開. 仲有唔該佢搞搞個MENU, D甜品已經改佐無得賣就唔註明, 搞到人滿心歡喜, 點知原來已經無佐餐牌上既甜品, 要睇另一個散MENU, 點知新嗰D甜品普通到暈, 於是埋單即走.
星期五同流沙包去完酒樓講數就落佐旺角, 我地上佐教協, 因為要買月餅劵. 我係第一次上去, 上面果然包羅萬有, 好似咩都有得賣咁. 睇下D月餅價錢, 果然幾平喎, 我阿媽係X華做, 用員工價買雙黃白蓮蓉都要六折$142.8, 但係教協買竟然仲平過員工價, 只係一百三十幾蚊, 如果我係員工就真係心淡囉... 我好新奇咁行佐陣教協, 又買佐D野食, 好平麻...
離開教協後我地去佐雅蘭食飯, 然後就搭車返屋企. 返到去係元朗公園見到有人係度拍野, 我八卦走埋去睇下, 但無電視台logo應該唔係拍緊電視, 我見到有一男一女係度做緊戲, 但我完全唔知佢地係咩野人, 應該唔係藝人掛? 所以都唔知到底佢地拍緊戲定拍緊乜野~~
我相信十個將會結婚既人有一半都會上新婚生活易交換意見同收集情報, 我都唔例外. 我去酒樓果區睇, 發現好多人都話聘珍樓有好多野改佐, 如永久週年紀念餐劵改佐做五年; 花柱拱門變佐做花牌, 甜品轉楊枝甘露由以前免費變為要加$50一圍, 每枱無佐佈置用波波... 我越睇越驚, 越覺唔對路. 蠢就蠢在自己當初落訂時無白紙黑字寫低酒樓方面應承過會包D乜, 因為我諗住聘珍樓都係有名既公司, 唔會出古惑掛? 但見到上網D人咁講, 於是決定自己打番張清單, 列明酒樓應承過會包D乜, 要酒樓簽名同蓋印.
好彩己到月尾埋數又9月大STOCK TAKE所以星期五下午都已經無咩野做, 好辛苦咁上網睇晒人地百幾版既留言講究竟而家聘珍樓包D乜唔包D乜, 用佐成個下午黎打果份清單, 放佐工之後即刻剷上聘珍樓, 今日星期五都竟然無人擺酒喎... 去到同個經理傾, 最後都傾掂數, 又了佐件心事~
流沙包話我都算開創先河, 竟然自己咁樣打份清單要酒樓簽名蓋印, 但我見網上面D人都係咁做架喎... 而且講到底都係白紙黑字証明安心D麻, 一來有個保障, 即使酒樓第時反口我都有野揸手; 二來咁我覺得都係大家好辦事, 費事第時有咩要拗數啦~~ 所以即使咁樣做唔係太好睇, 都無辦法啦, 結婚一世人一次, 我向來做野都唔要有任何差錯, 我要99.9%都掌握係我手裏面!!
