2007年2月28日星期三

2007年2月25日(日) 年初八 -- 揀衫

今日約佐奶奶佢地入黎元朗揀擺酒果日既奶奶衫, 我試埋褂, 流沙包試埋新郎禮服. 我地先去佐潮館飲茶, 我覺得D點心麻麻地啦, 飲完茶雅麗都仲未開門, 於是我地就去麥當勞食雪糕坐佐陣. 呢度既開心樂園餐有Keroppi呀, 流沙包即刻買佐個比我, 好開心呀! 後尾發覺原來拎個公仔包裝膠袋可以去抽書籤喎~ 但係我唔捨得拆膠袋喎(我通常買番黎既Keroppi都唔會用, 唔會拆袋, 原袋保存). 流沙包幫我係麥記度睇下有無人拆佐個膠袋唔要就走佐果D枱, 執佐個膠袋走. 我地初初執到一個, 我好乖咁去抽, 抽中佐張XO既; 於是流沙包繼續出擊, 再執多三個膠袋番黎, 今次我姑仔同埋我一齊出去抽, 佢好勁, 一次過嗱一堆書籤上黎, 然後先逐張睇下邊張係Keorppi(雖然張書籤有包裝袋包住, 但係個袋好薄, 所以睇到張書籤係咩公仔), 搞到個經理都寸我地話不如開個箱比我地慢慢揀... 然後我姑仔答佢, 我地都揀完囉. 最後我地揀多佐三張Keroppi書籤, 好開心呀~~~

之後我地去雅麗揀衫, 我先試褂, 我既原則就係唔會揀要加錢果D款, 同埋我都唔係咁著重著褂, 所以求求其其揀佐套. 跟住流沙包揀禮服, 佢都係揀佐套黑色, 因為黑色會比較襯番我D晚裝. 跟住到奶奶衫, 佢揀佐件奶奶褂, 要補多$300, 可以租多套衫都得lu, 佢套褂差唔多要$700... 又over budget...

揀完衫我地返屋企開枱, 夜晚等埋民民同阿娟上黎就玩射龍門, 好熱鬧呀~ 之後我地就去佐正記食飯.

連繼9日既新年假期就係咁樣渡過佐啦, 聽日又要返工, 唉, 我唔想返工呀, 尤其是返呢一份咁既工, 唉~~~~

2007年2月24日(六) 年初七 -- 好彩無事

本來今日約佐10點去做facial, 不過最後都cancel佐, 訓多陣好D. 好彩今日起身已經無咩事, 行得走得食得. 今日仲要返學, 好彩都仲有能力返去, 不過上佐半堂我已經無晒能量聽書, 坐係度等放學. 流沙包今日都出佐黎九龍塘, 因為之前我地拎羅浮宮D相底去scan, 先發覺佢地竟然比錯相底我地, 所以流沙包今日就出去羅浮宮拎番D相底, 跟住就接我放學. 我地係又一城行佐陣, 本來想買條褲見工用, 點知試上身一係就太細, 一係就太濶, 最後都買唔成. 然後去佐玩具反斗城, 我地買佐新果套電子版大富翁, 即係唔駛玩notes玩碌卡果隻, 我另外仲買佐好多Keroppi菓子玩具添喎, 好開心, yeah!!

買佐套新大富翁梗係要call人上黎試玩啦, 最後振宇同牛丸上佐黎玩, 我都唔明點解我玩親大富翁都係第一個破產果個, 嗚!

2007年2月23日(五) 年初六 -- 病到我死下死下

尋晚打完邊爐返黎都覺得有唔妥, 半夜訓訓下個胃已經好唔舒服, 半夜起身係咁疴, 想嘔又嘔唔出, 到天光果陣終於嘔得出, 但係都仲好辛苦. 流沙包今日要出去教波, 得番我一個人係屋企, 本來11點幾起身諗住溫下書, 點知都係頂唔順, 又嘔, 已經嘔水, 嘔到無野好嘔, 於是再訓過, 成日就係咁訓, 訓到七點流沙包返黎, 我成日都無食過野, 佢沖佐杯麥片比我飲, 本來以為好D啦, 點知剛剛飲完又想嘔, 將頭先飲既麥片又嘔番晒出黎. 本來我話唔睇醫生, 因為以我豐富既腸胃炎經驗, 腸胃炎就算睇醫生都無用, 佢都係開D止痛, 必要時服既止疴藥比你. 無論點都係要靠你自己疴番晒D菌同烏糟野出黎先會好得番.

不過流沙包見我嘔到面都青埋, 唔理咁多的佐我去睇醫生, 我一落到街又嘔, 去到醫生度, 佢叫我食佐D藥係診所坐十五分鐘, 如果再想嘔就幫我打止嘔針, 食完藥我都係想嘔, 於是唯有啪支針. 返到屋企坐佐陣, 又嘔, 連頭先食果D藥都嘔番晒出黎, 嘥氣! 我全日都無食過野...

我同流沙包講我都係過唔到今晚架啦~

2007年2月27日星期二

2007年2月22日(四) 年初五 -- 打邊爐

尋日同阿Rock佢地飲茶果陣話今日不如上阿Rock屋企打邊爐, 其實我唔係好想去, 我想係屋企溫下日文, 可以快D練番D日文去搵工. 同埋佢地傾計通常都係傾排球D野, 我又唔想係側邊咁悶, 打麻雀同佢地打又打得細我又唔想打, 所以一句到尾唔係幾想去. 但流沙包點會放過我, 最後都係脅持佐我出去. 阿Rock住係美孚, 都唔算好遠. 我地打完邊爐就打佐陣牌, 玩到十二點幾先返屋企, 打擾晒~~

2007年2月21日(三) 年初四 -- 閒

今日阿Rock同佢新婚太太Sunny上黎拜年, 其實係因為尋晚流沙包唔知download佐D咩搞到部電腦上唔到網, 於是急call阿Rock上黎幫手睇下, 不過流沙包轉過頭自己又整番好. 阿Rock佢地上黎坐佐陣, 我地就call埋振宇一齊去飲茶, 我地去佐西鐵站間囍慶飲茶, 食物都OK喎.

飲完茶阿Rock就繼續出去拜年, 本來話我同流沙包今晚玩煮飯仔, 振宇上黎食飯, 不過振宇尋晚通頂, 驚一陣唔知會訓到幾點先起身, 於是就決定佢上黎叫Pizza食算數. 我地下午就行下元朗, 去佐冒險樂園巡視業務, 我今日好好運呀, 掟彩虹中齊紅色黃色同綠色奬, 哈哈, 未試過咁勁架, yeah!

2007年2月26日星期一

2007年2月20日(二) 年初三 -- 濕地公園

今日一訓醒諗住搵阿媽飲茶, 點知原來阿媽已經係酒樓等緊位, 因為姑媽同舅父佢地今年好早就入黎拜年, 所以就索性一齊去飲茶. 飲完茶我同流沙包去佐濕地公園行, 我想黎濕地公園好耐架啦, 可惜一直都無時間(係流沙包無時間), 今日終於如願. 入場費成人$30, 我用學生証就半價$15, 哈哈~~ 濕地公園比我想像中大, 不過就唔係我想像中咁多野睇. 我地都係睇下花花草草, 用望遠鏡離遠睇下雀鳥, 睇下魚睇下蟹咁樣. 得閒親親大自然都係一件好事. 不過今日好多人呀, 如果平時黎就會行得舒服好多, 起碼無咁多細路無咁嘈.



流沙包話呢張相叫紅男綠女
     

不過要報告我竟然係濕地公園裏面發現有假Keroppi賣!! 太過份啦!!
我初初仲以為係咪咩特別版, 拎起手見佢個招紙有印上Keroppi家族既公仔頭係度, 但係就無寫Keroppi, Sanrio呢D字眼, 有D公仔張招紙甚至印上米奇公仔, 好明顯呢隻係翻版啦!! 太過份啦, 雖然佢全身都無印住呢隻係Keroppi, 但好明顯一眼就睇得出佢係抄Keroppi架啦!! 咁可唔可以告佢侵權架...?? 雖然隻公仔真係幾得意, 但支持正版既我, 係絕對唔會買假PIPI架! 同埋佢都賣得唔平喎, 成$50一隻... (不過真係好可愛呀... 我覺得造得可愛過D正版公仔, 通常D正版PIPI都唔係正常PIPI比例樣架麻, 你話死唔死)

睇得出我個樣係幾無奈


你見到張招紙竟然印上米奇老鼠...

2007年2月19日(一) 年初二 -- 返娘家拜年

年初二又一朝早出佐奶奶度食開年飯, 之後就返天水圍同阿媽拜年, 我個妹同男友都係度, 4個人當然又係開枱啦, 打到夜晚食飯, 今日抖足精神終於都嬴番少少. 今晚餐飯好豐富, 都係阿媽煮既飯最好味!!

2007年2月18日(日) 年初一 -- 恭喜發財, 香港九龍行大運

舊年既年初一我同流沙包身處北海道旭山動物園睇企鵝, 今年新年就要係香港過, 因為剛剛聖誕先去完關島, 又要儲錢擺酒, 所以今年新年無得去旅行, 同埋阿媽勒令流沙包今年要出現一齊拜年, 因為話費事到我結婚果日先第一次見D親戚喎. 我地朝早就出佐屯門奶奶度食齋, 然後就要出藍田姑媽屋企拜年同食lunch, 坐到四點幾就過麗港城伯娘屋企, 然後就一齊落灣仔去老人院探阿嫲. 真係遊勻香港九龍新界, 好彩有NDS(同流沙包)伴我左右.

探完阿嫲我同流沙包就返元朗, 我地去佐元氣食壽司, 跟住返屋企換件衫就去振宇屋企發大財, 我地打麻雀同玩魚蝦蟹, 不過我實在太攰啦, 玩到凌晨兩點幾頂唔順就走勒, 大年初一就輸麻雀, 唔老黎喎~~

2007年2月17日(六) 年三十 -- 團年飯

年三十晚我地要落屯門食團年飯, 食飯前去佐屯門市中心行街, 本來想買對黑色鞋見工用, 不過睇唔啱, 係IT睇中佐果對又無碼, 結果咩都買唔到. 之後就去佐大興食飯, 餐飯都無咩特別, 同埋真係唔記得食佐D咩, 哈哈~~

食完飯流沙包就去佐振宇屋企玩, 我就係屋企睇埋之前錄低既ANTM同Project Runway, CariDee嬴佐啦, yeah!! Project Runway好緊張, 睇完佢地設計既系列, 我買謝非嬴架, D衫好靚~

2007年2月16日(五) 年廿九

去安娜餐廳食完扒扒我地就去佐元朗個花市, 今年個花市位置離屋企都幾遠, 係東頭工業村, 我地搭車去, 行路返屋企, 返到屋企攰到死佐. 個花市都算幾大, 我地行均成個花市, 買佐盒花生糕香蕉糕之類. 本來想買個Keroppi金屬波波, 不過$60個實在太貴啦, 唔買!

安娜餐廳 -- 鋸扒囉...

地址: 元朗仁樂坊5號地下
電話: 2479-5555

年廿九晚去佐安娜餐廳食扒, 我叫佐個豬扒餐, 流沙包叫佐個春雞餐. 個豬扒餐有兩塊大豬扒, 我淨係食到一塊, 另外一塊搵流沙包幫我搞掂佢. 流沙包個春雞唔係鐵板上, 同埋等佐好耐. 對呢度既晚市扒餐無咩意見, 不過午市既全餐就抵食好多.

是次消費每人約$80

龍華皇宮酒樓-- 幾抵既, 不過上菜好慢喎...

地址: 屯門大興邨大興酒樓大廈
電話: 2988-1868

15號晚同流沙包屋企人去佐呢度食飯, 佢新開我第一次黎食, 奶奶(唔知聽邊個講)話呢間酒樓裝修用佐三千萬喎... 用三千萬去裝修一間屋村酒樓? 回報率會有幾大呢? 我地叫佐個翅, 燒味拼盤, 泰式炒飯, 釀豆腐... 事隔太耐我都唔係好記得D餸. 上菜好慢, 不過D野都算OK, 同埋唔貴囉, 5個人食飯都係$400.

是次每人消費約$80

許願樹 -- 情人節套餐

係咪好奇怪點解我個blog咁耐都無update呢? 因為我通常都係公司寫blog架麻(我通常都好少用私人時間寫blog), 我公司由年初一放假放到年初八, 今日初九先開工, 所以我咪一直都無update過囉, 我今日會盡量update番晒架啦, 哈哈~

地址: 元朗教育路87-99號鴻發樓地下E舖
電話: 2442-1811

由情人節果日開始update, 我同流沙包係情人節果日返元朗食飯, 因為費事係出面食咁貴啦. 我地訂佐枱去許願樹食, 情人節套餐兩位$498, 頭盤係焗蠔, 唔知咩卷同埋唔記得佐咩肉. 餐湯係龍蝦湯, 不過個湯好似淡佐D. 跟住係煙三文魚, 然後主菜我要佐個羊架, 流沙包要佐個火焰牛柳. 個羊架普普通通啦, 流沙包話個牛柳唔得.

甜品係焗雪米糍, 普普通通.

是次每人消費約$200

    

羅浮宮影相, 有相睇啦~~

total有42張相, 呢度梗係唔post晒出黎啦~~

 
 
 
 


 
 

2007年2月17日星期六

聚滿庭京川滬名菜 -- 飯堂之二

地址: 深水步西九龍中心七字樓711室
電話: 2360-2883


星期日去羅浮宮攞完相我地黎佐呢度食飯, 呢度都可以算係我地飯堂之一, 因為呢度既野真係好好食, 今次我地叫佐雞絲炒豆苗, 黑醋排骨, 糖醋魚塊, 鹹蛋炒南瓜, 紅油抄手同八寶伊面. 其中鹹蛋炒南瓜係每次黎都必叫既, 佢亦都係吸引我久唔久就要黎幫襯既原因之一. 我食過咁多間京川滬菜館, 都未見過其他地方有同類菜色, 所以隔一排就會返黎幫襯.

係咪奇怪點解我地兩個人都叫咁多野呢? 因為我地預埋聽日lunch帶飯果餐麻, 所以兩個人叫佐六樣野.

是次每人消費約$200

 

羅浮宮攞相~

上星期六羅浮宮打黎話D相攞得, 我地就星期日出去拎, 我地只有兩本8X12"相簿, 同一幅20X24"油畫, 同埋有4張2R相. 揀相同攞相簿隔佐兩個月, 我地都唔係好記得自己揀佐咩野相, 如果佢曬錯其實我都未必知. 記得揀相果陣我唔係好滿意D相, 但而家睇番曬佐出黎既相簿又覺得OK喎, 唔係太差啫.

不過D野好重呀, 由九龍塘拎返屋企好攰.

(D相底拎佐出去搵人scan, 遲D會有靚相睇架啦~~)

2007年2月16日星期五

諗深一層, 結婚到底係為佐乜野...?

最近為佐結婚既事唔多開心, 一句到尾都係因為錢. 點解人地身家咁豐厚, 但係少少數目都好似要計到足咁? 即使假設只係開玩笑講下, 我聽到都覺得唔開心. 點解做大既就好似永遠要係蝕底果個? 細個係屋企就永遠要讓細妹, 有咩唔啱都係我錯, 好啦唔緊要, 果個係我親細妹, 我年紀係大過佢, 我係佢家姐. 但係嫁佐之後, 我老公又係大佬, 我就變佐大嫂, 大嫂咁又點呢? 但我年紀係全屋最細果個, 搵錢係最少果個喎... 點解做大既就要咁多義務, 但係就無咩權利無payoff? 如果比我再揀我可能唔想咁快結婚, 我而家發覺結佐婚其實都無咩著數. 我同我老公一向都係自己顧自己開支, 層樓係佢未識我時買落既, 層樓係佢個名, 供樓係佢既錢, 屋企水電煤佢交, 出街食飯多數佢比錢, 有時我同佢行街買野佢會出錢送比我. 我基本上係自己顧番自己開支, 仍然會比家用阿媽, 最多係負擔下去百佳買野既開支, 無家用攞.

但係過時過節就要比錢對方屋企, 其實係我比錢阿媽話係我老公比佢, 佢比錢佢阿媽話係我比佢過節. 結婚前我都唔會過時過節額外比錢屋企. 結佐婚又要派利是, 開始有自己屋企, 開支又大佐. 其實我又唔打算生, 都唔知結婚黎為乜. 最近淨係覺得, 結婚只係令我自己份人工要分多佐出去比其他人, 錢駛多佐, 責任負擔大佐, 身份多佐(變佐大嫂, 人地新抱...), 淨係得付出, 但無回報無咩野得到過, 淨係覺得只係可以更名正言順更開宗名義地比人屈比人攞著數, 開始覺得結婚係捉蟲... 結婚黎都唔知為咩...

小金井日本料理 -- 好味好味!

地址: 元朗馬田路50號朗景臺一座1號鋪
電話: 2944-3111

上星期六去佐小金井食晚飯, 我地叫佐築地壽司盤, 蟹皇卷, 北海道pizza, 雞肉捧, 黃金汁焗白菌同蟹粥.

築地壽司盤 - $39有10件, 有三文魚, 吞拿魚, 鰻魚等
蟹皇卷 - OK好食架~
北海道pizza - 佢細細個, 直徑約5~6吋左右啦, 幾特別, 佢下面果塊「餅皮」係炸魚柳, 上面有D魷魚之類既野, 幾好食架~
雞肉捧 - OK
黃金汁焗白菌 - 超好食, 佢個汁好正呀, 好好味, 我用黎撈晒落D蟹粥度.
蟹粥 - 都算幾多蟹肉, 同埋味道都OK. 不過蟹粥黎講暫時我食過最好食既係魚一丁~~

是次每人消費約$120

Annual Dinner -- 最差的一次

上星期五晚係公司annual dinner, 之前一向係洲際搞, 今年發神經去佐中港城皇朝匯, 唔係為佐個lucky draw我都唔想黎. D野食包括有江南六小碟, 蟹肉炒豆苗, 唔知咩菜胆翅, 星斑, 乳鴿... 食物就普普通通啦, 條魚唔夠滑, 服務麻麻. 不過個場叫做幾OK, 夠四正, 同埋無乜柱, 如果場地黎講用黎擺酒係幾好, 不過皇上皇集團... 質素如何心裏有數啦~

講番個lucky draw, prize list如下, total有60份:

















































































































































































Annual Dinner 2007/02  Lucky Draw Prize List
1Golden Lucky Pig (Lukfuk Jewellery)8000.0021Samsung Z5 MP3 (2GB) 
2Sony DCR-DVD755 Video Recorder6000.0022Gucci Key holder 
3Nokia N73 3G Phone4000.0023Adidas (couple watch) 
4Sony Ericsson W850i Walkman Phone3300.0024Louis Vuiton (LV Name card holder) 
5Canon Digital Ixus 8503200.0025Gucci Unisex (telephone rope) 
6Wii (game player)2500.0026Vivianwest Wood Classic Wallet 
7Dunhill (Men Wallet)2000.0027Prada Card Holder 
8Samsung T9 MP3-MP4 (2GB)1500.0028Folli Follie crystal (頸鏈 necklet) 
9Bally Men's Belt1500.0029Prada Porta Cell Saffiano (telephone Rope) 
10Gucci Key holder1500.0030Scarf Gift Set 
11Sony PSP 31JVC Mini Home Theather 
12Sony PSP 32JVC Mini Home Theather 
13Louis Vuiton (LV Name card holder) 33Agnis b fashion bag + telephone rope 
14NDS (game player) 34Folli Follie Gold Material bracelet (手鏈) 
15NDS (game player) 35Burberry keyholder 
16Dunhill (Men Belt) 36Polo Men Wallet 
17Zeta Portable DVD Player 37Vivianwest Wood Classic Wallet 
18Folli Follie bracelet (手鏈)) 
19iPOD Nano 2GB MP3 Broadway gift voucher5000.00
20Samsung Z5 MP3 (2GB) Sogo gift voucher4000.00


我記得前年抽中佐個尾二奬係一個垃圾閃閃燈(即係開著佢望上天花板有D圖案燈光係度轉轉下果D), 舊年咩都抽唔到, 又無安慰奬. 今年我抽中15th奬呀~!! 大家估下係咩?? 哈哈, 我頂呀! 係SOGO $300現金劵呀! 點解15th奬都係得$300咁少? 因為佢今年唔知做咩發神經將D禮物撈亂晒, 我對落果個第16th奬係價值$3300既SONY walkman phone呀!! 我15th奬就得$300現金劵! 真係火都黎, 佢以前年年都將D禮物由cheap至貴順序抽架麻, 如果我舊年可以抽得中15th奬, 份禮物都值千幾蚊啦!! 今年抽中15th奬就將D禮物撈亂晒黎抽, 真係谷氣!! 講真抽奬抽到D咁既細雞野我寧願你抽唔中我, 唔該唔好抽走我剩餘少少既抽奬運, 只係換黎果幾百蚊cheap野... 抽唔中既人都每人可以得到$100百佳劵做安慰奬啦, 我15th奬都係得$300蚊, 吹脹!!
 舊年我咩都抽唔中又唔見有安慰奬!! 仲有呀, 之前每年除佐個prize list之外, 仲會有壓軸既現金抽奬, 每封$2000既利是架麻!! 今年轉佐新cheap老細, 當然係咩都無啦~~

之後同事話一齊搭的士返屋企, 我以為佢地call佐的士啦, 點知原來無call到, 隨街截, 又唔講價!! 大佬尖沙咀返元朗呀! 最後五個人搭都要每人夾番$50! 我平時OT call六折的返元朗都係$150咋麻... 好肉赤呀. 早知佢地無call的士我就寧願搭巴士返去啦...

Ashley 33 Bar & Restaurant -- lunch好選擇

地址: 尖沙咀亞士厘道33號地下
電話: 2771-3399

上星期五同同事一齊出街食lunch, 我叫佐個日式咖喱雞翼飯, 幾大碟, 幾好食. 價錢又唔貴, 雖然唔包餐湯, 但係埋單都係每人三十幾蚊, 而且餐廳環境又唔錯, OK架.

是次每人消費約$38

2007年2月15日星期四

上Global Wedding攞關島影既相, 又一肚氣!!

Global Wedding話關島返黎後4~6星期先有相攞(數碼相, 燒落CD), 佢6號果日終於打黎話攞得, 於是我地就即日放工上去拎. 但換黎既又係一肚氣... 首先我同流沙包記得係EXPO落訂果陣問過, Queenly佢話會比番晒D相底我地架麻. 所以我地先一直以為有100張佢執過既相, 另外仲會有所有既相底. 尋晚上到去佢話從來個package都唔包所有相底喎. 結婚既人真係好蝦D架? 餐餐未比錢果陣就乜都應承乜都話有, 比佐錢之後就反口話從來無D咁既事. book酒樓係咁, 而家Global Wedding又係咁. 下次再book D咩真係要學精, 有乜野真係要錄埋音, 少少細節都要好老土咁白紙黑字寫低簽名作實先得!!

佢本身package既資料寫到咁, 再加上當初係EXPO佢都話有, 所以我就以為會攞得番所有相底架麻!!

專業攝影 Digital snap (100張連光碟)
所有底片燒CD (jpeg) All netgative return in CD (jpeg)
錄影連影帶 Video taking (edited 30min. video covering chapel ceremony)
專貴相簿連21張相[8x12] Elegant Album with 21 @ (8x12)

仲有呀, 我隻碟話就話有104張相(佢仲話104張相已經比多佐我地啦喎!), 但係嚴格黎講得92張相咋, 因為有12張係重覆既: 其中有6張係monotone既相(張相變佐黑白), 同埋有6張大size既相. 問題係, 果6張咁既黑白相, 流沙包用photoshop都識整啦; 果6張大size既相, 全部都唔係我心水揀作油畫既相囉.

不過要讚既係我個攝影師真係掂, D相真係靚, 角度攞得幾特別. 係無助手無反光板無腳架既情況下(不過關島D陽光咁勁, 都唔駛呢D野啦)都可以影得咁專業, 值得一讚!!

講真其實關島World Bride既服務真係幾好, 可惜佢地係香港搵間咁既Global Wedding做代理...