2007年6月30日星期六

小南國狀元樓 -- 唔多抵食

地址: 尖沙咀麼地道66號尖沙咀中心1樓
電話: 2369 8899



今個月既聚會約佐係呢度食, 我地叫佐鎮江排骨, 涼拌茄子, 醉雞, 豆腐羮, 蟹粉拌面, 小籠包, 煎黃魚. 我覺得唔係話特別好食, 但係價錢就好似比出面貴好多咁... 同埋我覺得無咩食物款式揀, 我睇完成個menu都揀唔到D咩食好.

 

同埋我個小籠包唔知係咪一早穿佐, 食落都無咩汁係裏面既... 嗚...

2007年6月29日星期五

綠雅快餐咖啡室 -- D飯好多啫...

地址: 上環永樂街71-77號嘉匯商業中心地下B舖
電話: 2851-8248

星期三同同事一齊出去食lunch, 本來唔係想黎呢間, 但因為實在太大雨啦, 唔想再行於是就入佐黎. 我叫佐個瑞士雞脾飯, 好快就上. 不過有個同事要瑞士雞脾意粉, 就催幾廿百次都未上到, 有同事叫星洲炒米又係要等好耐. 我覺得呢度既「特色」係D飯好多囉, 但係D餸就唔係好多, 味道一般, 唔值得再黎.

 

是次消費每人約$38

 

2007年6月28日星期四

咖喱薯仔雞翼 -- 好味道~~

上星期六又親自下廚煮飯, 今次整日式咖喱薯仔雞翼, 因為流沙包佢鍾意食日式咖喱, 不過我買果盒日式咖喱個味道就麻麻地, 咖喱味比較濃, 唔夠甘味. 呢道菜做法簡單, 好好味道呀~~

 

因為用手提電話影, 所以光暗度麻麻...:

2007年6月27日星期三

好鮮味 -- 香酥拼盤, 正呀!!!

地址: 元朗青山公路234-242號地下5號舖
電話: 2944
-1755/2944-1566

上星期五放工無去街, 同流沙包返佐元朗食飯. 我地去佐好鮮味食米線. 我叫佐個雞翼米線, 流沙包叫佐個豬軟骨米線, 我地另外仲叫佐個香酥拼盤, 個拼盤好正呀, 有魷魚鬚, 花枝丸, 豆腐, 雞柳同春卷, 都只係$30咋, 好抵食呀, 好味道~~

不過杯朱古力咖啡味道就麻麻...

是次每人消費約$40





 

喜尚海鮮酒家 -- 乜而家D酒樓成個food court咁...

地址: 元朗西菁街10號好順泰大廈一樓全層
電話: 2479 3003



端午節假期, 流沙包竟然唔使做野, 於是我地去佐新開果間喜尚酒樓飲茶. 而家D酒樓越黎越「多元化」, 除佐點心之外, 仲有京川滬點心如小籠包, 紅油抄手之類; 仲有泰式食物如泰式湯河, 泰式鳳爪; 同埋有壽司, 刺身及日式拉面添喎... 唔知幾時可以order埋牛扒, 焗田螺等等呢???

 

我地叫佐5個點心, 主要叫大點以下, 無叫特點頂點果D. 我地叫佐芝士長春卷, 紅油抄手, 小籠包, 餃子拼盤, 炸饅頭, 味道OK啦.

 

是次每人消費約$45

2007年6月24日星期日

頂呀, 我以為自己上緊歷史堂呀~!!

以下係我呢個Sem所讀既科既其中一部份notes, 差唔多每一份note都會有呢D咁既歷史圖片. 大家猜猜我呢個Sem到底讀緊D咩? 歷史? 藝術?

我呢科係Department of Economics and Finance既International Trade呀!! 頂呀, 條阿sir低能架?!!! 餐餐嘥時間係度講歷史講文物, 黐Q線架~ 應該講解果D curve呀, formula呀就係咁易講兩句就算. 條阿sir又唔知邊度請返黎, 應該係大陸佬, 佢話自己係美國教書架喎, 但係D口音, 嘩, 難聽到爆, 有時都唔知佢到底講緊咩英文, 堂堂都上到我想死.

我自問係一個好學生, 返學都想學野, 唔係懶懶閒求其考試及格, 堂堂遲到早走勁走堂果類但求畢業有張cert果D人. 但係今個Sem咁唔好彩遇著過咁既低能阿sir, 我堂堂都上一半就走, 後尾仲索性走堂唔返算數. 我真係頂佢唔順呀!!!

以下就係佢既note其中一部份啦, 你地慢慢欣賞啦~~

*******************************************************************************************



  1. No barriers to trade
              World trade is assumed to be free from any impediments, such as tariffs, quotas, voluntary export restraints, and exchange control.


  2. No transportation cost















After the industrial revolution in the mid 1800s, major cities were connected by railrods, reducing the transportation costs further. Lawrence of Arabia helped the Arabs to recapture Aqaba from the Turks. Arabs eventually ousted Tursk from the region now known as Saudi Arabia. As a result, Israel gained its independence in 1948.


Procession of Horsemen and Chariots, Eastern Han, 25-220 AD.

Romans built good roads such as Via Appia and Via Ignatia, connecting various parts of the Empire, reducing the transportation costs. Good roads made it possible for the Romans and the Chinese to utilize horse drawn chariots for fast communication and transportation.There were bandits in various regions and pirates in the ocean, but the Romans made it sufficiently safe for ordinary people to travel.

Luke 15:13 "Not long after that, the younger son got together all he had, set off for a distant country and there squandered his wealth in wild living. 14 After he had spent everything, there was a severe famine in that whole country, and he began to be in need. 15 So he went and hired himself out to a citizen of that country, who sent him to his fields to feed pigs.
The Prodigal Son by Pierre puvis de Chavannes (Washington National Gallery). This parable suggests that people were able to travel easily to foreign countries during the time of Jesus. Travel was relatively safe and affordable by the emerging middle class.

2007年6月22日星期五

2007年6月17日(日) -- 舊衫一掃清

今日返佐娘家做節食飯, 又係我執房既時候. 無錯, 自從我結佐婚之後, 我既個人財產仍然係娘家, 無搬埋去新居. 因為新居根本都已經無位擺野啦~

 

今日我終於清晒D衣櫃, 清晒D舊衫. 好多衫都已經無咩機會著, 所以全部會捐晒去舊衣回收, 我諗果堆山應該都有幾百件衫褲係度, 有D甚至係買返黎擺幾年都未著過, 好浪費啊...

2007年6月20日星期三

2007年6月16日(六) -- 川龍BBQ, 好遠耶~~


今日同流沙包一齊去佐佢舊同事位於大帽山川龍既村屋BBQ, 由荃灣地鐵站搭的士要搭三十幾蚊先到川龍村, 好遠耶~~ 不過唔知點解, 流沙包同佢D同事開始陸續唔舒服, 主要都係胃痛, 所以都唔係燒佐好多野食, 我都未發揮我既小宇宙黑洞能力, 我都係食佐好少野咋, 仲要燒燒下開始落雨, 不能盡興...

終於買佐新電話, SE既w610i

6月15日同流沙包食完飯只係八點幾, 九點九先夠鐘去睇戲, 兩個傻瓜於是落佐旺角買電話(鬼叫尖沙咀無衛訊咩...), 我地先去佐衛訊問價, $2580, 送一電, 藍芽, 機套, +$100可轉1GB卡, 同埋有姆明cushion同鐳射刻名電池蓋送. 之後再去隔離鐳射問價, $2630(好似), 送兩電兩差, 機套, +$99可轉1GB卡. 比較下我地當然選擇佐係衛訊買啦~ 而且鐳射既sales好唔pro, 問加幾錢可轉1GB卡都要走去check, 呢D答案唔係應該記晒入腦既哩咩?

我終於都有新電話用啦, yeah!!!


圖片來源: http://hk.phonedaily.com/mobile/photo/?prod_id=2589

2007年6月19日星期二

La Brasserie -- 法國菜, OK既~

地址: 尖沙咀海港城Marco Polo酒店
電話: 2113-7925

2007年6月15日(五) 流沙包又老一歳~

 

6月15日係流沙包生日, 我地去佐Marco Polo食飯, 今次食飯完全唔記得佐影相, starter我地叫佐個snail, 主菜我要佐個quail, 流沙包要佐個意大利雲吞, 個quail幾好味, 不過要拆骨就麻煩D, 流沙包個意大利雲吞就普普通通啦...

 

是次每人消費約$230 (流沙包係會員已經計佐50%OFF)

186c洋食居酒屋 -- 成鬼日都漏單架...

地址: 中環機利文新街10號地下
電話: 2545-2880



上星期一無帶飯, 所以同同事出佐去食lunch, 呢間餐廳我係第二次黎, 我兩次都係叫定食, 今次我叫既係雞扒帶子定食, 呢度既定食好好味, 多料, 有粟米粒同中華沙律呀~ 醬汁都好味.

 

不過缺點係呢度既座位好迫呀, 同埋次次黎都漏單既, 例如明明叫3個C餐, 可以淨係黎兩個, 剩低果個硬係會漏單, 要催幾廿百次先至黎, 其他人都差唔多食晒咁濟囉...

 

是次每人消費約$50

2007年6月17日星期日

豬扒腸仔西蘭花意粉+煎窩貼+湯

上星期六自己係屋企玩煮飯仔, 不過今次就簡單得多, 只係整佐個豬扒腸仔西蘭花意粉+煎窩貼+湯(有D九唔搭八...)


豬扒腸仔西蘭花意粉 $14.5


材料:
意粉 (屋企有)
豬扒3塊 $9 (百佳)
西蘭花一個 $3.5 (百佳)
意粉醬 (屋企有)
雞肉腸兩條 $2 (百佳)

做法:
a) 豬扒切成小塊, 鹽, 生抽, 燒油, 生粉調味
b) 將西蘭花洗淨, 切細
c) 香腸切小片
d) 將意粉煲熟, 夾起晾乾水
e) 西蘭花用滾水淥淥
f) 開熱鑊加油, 先將豬扒, 香腸落鑊煎香
g) 再落意粉, 西蘭花, 加少許鹽
h) 最後落意粉醬, 炒多兩炒, 完成上碟


五瓜豬展湯 $19

材料:
湯包 $15 (百佳)
清雞湯 $4 (百佳)


煎窩貼 $10 (百佳)

唔駛講解啦掛...


好味道~~ 是次晚飯總共$43.5

2007年6月16日星期六

死得的起心肝去大掃除的一天...

說話我成日話自己讀書好忙, 返工好攰, 所以間屋永遠都亂糟糟, 做野無手尾D野鍾意隨處放. 上星期六終於都的起心肝去做佐次大掃除, 原動力就係我班新同事會月尾上黎我屋企玩, 唔可以太失禮...

我既工作包括抹塵, 洗衫, 晾衫, 吸塵, 還有洗廁所呢個大project, 洗到我呀...

我仲好叻煮埋晚飯添喎~~ 流沙包我係咪好抵錫呢?? (其實係想少少地補償番我唔係一個稱職劉師奶...)

 

西門町台灣麵食 -- 幾好喎...

地址: 旺角通菜街2號鴻光大廈2N號地舖
電話: 2332-4673

上星期五行完i.t.後無力再行, 於是去西門町食飯, 網上睇食評見呢度讚多過彈好多, 於是諗住黎試下. 我地叫佐個二人套餐, 揀佐小食拼盤, 炒菜, 腐皮蠔仔卷, 擔擔面同擔仔面, 另包兩杯飲品同埋甜品(兩舊類似桂花糕既物體). 食物真係幾OK, 我最鍾意個拼盤, D野好好食, 不過我覺得個面就普普通通, 個擔擔面都唔夠香. 不過呢度勝在唔係貴~~

是次每人消費約$70


2007年6月15日星期五

2007年6月8日(五) -- 去i.t.進貢

今日繼續行旺角, 主要係去朗豪坊既i.t行, 係裏面買佐兩件衫, 分別係Baby Jane同埋傘仔, 呢期我比較鍾意Baby Jane, 兩件衫總共八百幾蚊... 另外係b+ab買佐兩條返工褲, 一條黑色一條灰色, 終於都買到褲返工啦, 哈哈哈~~

Spice Market -- 比Coffee Mill好得多...

地址: 尖沙咀海港城香港太子酒店3樓
電話: 2113-6046


2007年6月6日(三) -- 與流沙包在一起的日子, 第731日, 晴

今日係我同流沙包拍拖2週年紀念日, 所以去佐呢度食飯. 佢呢期做緊日本食品, 呢度既buffet比起Coffee Mill好好多, 食物種類多D, 好多熱盤選擇, 味道又好D. D生蠔唔錯, 大隻. 甜品都比Coffee Mill多, 不過款式都係一般. 呢度既價錢好似二百幾蚊一位, 由於流沙包係Marco Polo Club會員, 所以享有半價.

 

是次每人消費約$150 (原價二百幾蚊位, 我地計佐50%OFF)

有結婚video睇啦~~~

等佐兩個月, 終於有結婚果日既video睇啦, 由於我心急, 所以4號果日一放工就即刻落銅鑼灣拎, 終於睇到班姊妹點樣玩班兄弟, 哈哈哈~~


個包裝好pro咁, 總共3隻碟, 第三隻係D精華片段, 每隻約半小時左右.

2007年6月13日星期三

堂記辣蟹餐廳小廚 -- 無咩特別...

地址: 元朗水車館街榮興閣90號A-B舖
電話: 2479-6639



6月2號果日行完旺角(其實未行完, 不過已經好攰, 下次再繼續), 我地就返番元朗同阿媽食飯, 地方係阿媽提議. 呢度既招牌菜當然係炒辣蟹啦, 我地都叫佐碟, 我覺得味道就普普通通啦, 無咩特別. 我地仲叫佐個乜鬼炒米粉, 一個菜, 一個士多啤梨肉排, 一個粟米羹. 結論都係無咩特別囉...

2007年6月12日星期二

我要換新電話!! Sony Ericsson既w610i好唔好??

話說我而家用緊既電話係已經用佐三四年既Sony Ericsson T630, 近排部電話似乎開始壞, 我明明係屋企鬼咁寧靜又收到「爆晒格」, 但D friends打黎都話我附近好嘈同收得唔清, 搞到我講電話講到潑婦罵街咁同埋好似神經病人咁一句說話要重覆講幾廿次.

 

其實早前w880i剛剛出果陣我有考慮過換呢部電話, 不過大拿拿成四千蚊又好似唔多值, 我又唔會用得著3G既. 其實我都唔多熟而家電話D功能, 近排係咁依search過下, 諗緊好無換w610i好, 價錢無咁貴, function好似又OK咁. 求其部電話可以聽下歌, 影下相, 唔好太重太大部, 咁就OK架啦~ 定抑或換w660i好??

 

各位有無咩其他好建議?? (我用開Sony Ericsson既機, 我諗我唔會轉用Nokia, LG果D牌子架啦~)

2007年6月8日星期五

2007年6月2日 -- Keroppi大豐收~

星期六難得流沙包只係朝早有野做, 所以今日我地出佐旺角行, 本來我既目的係想行街買返工衫褲, 但最後就買佐好多公仔返屋企, 我終於買到Keroppi畢業公仔啦, 好開心~~ 其實幾年前Keroppi係香港都有出過畢業公仔, 不過係港版license貨, 成個公仔都唔啱比例, 完全唔似Keroppi, 所以我無買到. 係潮流特區行行下見到有間賣Qoo畢業公仔, 見幾得意幾特別, 咪諗住買黎畢業用囉. 之後行到第二間, 估唔到竟然有隻日版既Keroppi畢業公仔, 呢隻個樣比港版果隻可愛好多, 於是最後就買佐兩隻畢業公仔勒~~ 另外仲買佐少少Keroppi產品.

  
 

Ciao Ristorante Italiano -- 我覺得物有所值

地址: 深井深井村85號地下
電話: 2496-4223


上星期五去佐深井食飯, 但我地唔係去食燒鵝, 我地去佐間意大利餐廳食buffet, 平日好似係$128, 五六日好似係$148/位. 佢既形式唔係擺晒出黎自己拎果隻, 佢係任點任order果隻. 呢度既食物種類都算多, 沙律, 頭盤, 主菜, 餐湯, 甜品都有, 自己睇相啦~

 

同埋呢度部份飲品係$28無限添飲. 整體黎講百幾蚊既價錢可以有咁多選擇, 你仲想點先~~

 

是次每人消費約$200







2007年6月6日星期三

芽莊越式料理 -- 好多外國人幫襯既越南菜館

地址: 中環威靈頓街88-90號地下
電話: 2581-9992



剛剛先知原來我公司同叔仔民民既公司好近, 所以上星期五同佢一齊食lunch. 民民介紹下我地去佐芽莊, 去到已經有人等緊位, 我地都要等到十二點十先有位. 我叫佐個燒肉撈檬, 民民叫左個燒蝦撈檬, 另外仲叫佐個蝦粉卷小食, 個撈檬味道唔錯, 同埋呢度價錢都唔算貴, OK啦~

 

無聊一提呢度好多外國人幫襯, 坐我對面既係一對韓國女人, 坐我左面既係個肥鬼佬.

 

是次每人消費約$70

地茂粥麵小廚 -- 算OK, 又唔貴

地址: 上環信德中心商場2樓294-295號舖
電話: 2548-8228

上星期四有新同事返工, 所以幾個同事一齊出佐去同佢食飯, 我地去佐信德中心既地茂, 叫佐幾個套餐share食, 有魚香茄子煲, 西檸雞, 什菜粉絲煲, 燒味拼盤, 炒牛肉等等. 套餐包白飯一碗, 同埋飲品or例湯. D小菜幾好食, 上菜都算快, 唔駛等乜濟, 同埋價錢唔貴喎, 除番開每人只係$30.

 

是次每人消費約$30

 

2007年6月4日星期一

港式茶餐廳 -- 貴貴貴!!

地址: 中環德輔道中84至86號
電話: 2542-2288

上星期一幾個同事出去食飯同某同事慶祝生日, 估唔到佢地既地點係茶餐廳. 不過本身都唔係打算黎呢度, 只係我地本身想去果間粉面店太多人, 所以先退而求其次黎佐呢度.

呢度D野好貴囉, (我就叫佐午餐, 連湯, 飲品, 同雞扒天使面盛惠$42, set lunch黎講唔算好貴); 但其他食品如一碗普通粉面都已經要三, 四十蚊囉... 咁既價錢我寧願比多少少錢去D服務好D, 坐得又舒服D既餐廳食飯囉...

是次每人消費約$40

 

2007年6月2日星期六

2007年5月26日(六) -- 祝賀舊同學新居入伙~~

今日去佐個舊同學屋企玩, 佢新居入伙, 我地成村人上去搗亂. 好欣賞佢家居既設計, 個廳有個大櫃, 可以將D雜物收晒入去. 睇番我自己間屋, 雜物越黎越多, D野越黎越亂, 尤其是我D Keroppi收藏品, 都已經唔知擺去邊度好… 第時搬屋/裝修都可以參考下佢既設計. 另外女主人好勁, 又馬豆糕又tiramisu, 果日食到好飽呀~~

其實呢位舊同學, 甚至乎今日一齊上去搗亂既其他舊同學, 同我以前讀中學果陣都唔算好friend, 因為都唔係玩開果堆. 所以畢業後咁多年竟然間唔中可以keep住見面, 我覺得幾難得架. 同埋人大佐心態都會變, 以前小朋友就會圍堆搞小圈子, 我地玩開呢班人就係呢班人, 唔會約其他圈子既人一齊玩; 但人大佐畢佐業, 都唔會再理大家以前係邊一堆人, 畢業後間唔中都會一齊出黎聚下舊, 雖然無可能約得番晒咁多人, 有D人真係畢業後就好似消失佐咁無再聯絡過, 但起碼大家都仲維繫得到, 所以我都好珍惜呢D gathering既機會, 如果我係得閒既我都一定會出席.

反而同以前玩開果D, 畢業後竟然只係見得唔知有無五次面, 每次見面約親佢, 一係就永遠唔接電話, 一係就話唔得閒, 一係就應承佐話會出黎, 但到果日就完全無露面, 電話又無個, 打比佢又唔聽. 事後問番佢咩事甩底, 佢總係有層出不窮既理由同藉口.

甚至乎到我結婚, 打算搵佢做姊妹, 佢係電話度應承佐, 但係到姊妹開會日又一如以往放飛機, 電話又無個. 之後我都怕佢係我結婚果日先放我飛機, 我都同佢講見佢咁忙唔駛佢做姊妹, 只要佢果日黎飲就得勒, 我地姊妹仲開玩笑講驚佢連我結婚果日都會放我飛機連飲都唔黎飲. 點知後尾我派帖比佢, 約佐係我結婚前一日出黎派比佢, 佢出到黎先至話我知聽晚黎唔到, 因為佢上司(佢教書的, 都會有上司? 唔通佢校長結婚乎??)都係聽日結婚喎, 然後做佐二百蚊人情… 原來我地十幾年友情都比唔上佢既「上司」結婚. (雖然我懷疑佢呢個都係大話)

事後我不斷回想, 係咪我/我地中學果陣做過D咩令到佢唔開心, 所以佢心裏面根本唔想再同我地keep contact, 因此就不斷放我地飛機, 甚至乎我幾個月前通知佢我會結婚, 佢都要係我結婚前一日先話唔黎呢?? 既然佢已經無心同我地再來往, 咁算啦, 我已經當無佐呢個朋友… 我以後都唔會再搵佢了, 以免再自討苦吃.

2007年5月24日(四) -- 探索之旅

返到屋企抖佐陣, 我地又再繼續「探索之旅」. 我屋企附近有個市鎮公園, 環境幾好, 同埋假期都會有好多人黎放狗/玩等等. 但係我同流沙包係附近住佐年幾兩年, 就完全無行過入去公園裏面睇睇, 所以我就提議趁假期去行下. 原來呢個公園真係幾大, 環境幾唔錯, 有人工湖, 個湖有好多魚魚同龜龜架, 好可愛~ 又有D運動設施如比你做sit up, 引體上升果類; 有兒童遊樂場; 有五人同七人既足球場; 仲有個好大既草地添喎. 另外可惜我地太遲黎, 百鳥塔6點關門, 我地不得其門而入, 唯有下次再黎過~~

  
  
 

2007年6月1日星期五

2007年5月24日(四) -- 尋找童年回憶

佛誕假期, 終於做佐件我想做好耐既事. 我今日返佐屯門, 去返我細個讀書同長大既地方. 我地先去佐屯門海翠商場同啓豐園, 呢兩個係我讀中學既時候成日會黎既商場. 海翠商場變佐好多, 變佐個幾似樣既商場. 跟住過啓豐商場睇睇, 格局無咩點變, 同埋估唔到有D舖頭十幾年黎都仲係度, 包括文采, 小桃園同埋我讀中學果陣好鍾意去既角落餐廳, 估唔到仲未執~~ 好感動呀~~~ 即刻係角落餐廳食lunch.


之後我地就行去中學, 呢間係我同流沙包都讀過既中學, 我係度讀足7年, 流沙包就短D, 只係讀佐兩三年. 同埋流沙包大我四年, 應該係我中一果陣佢已經中四, 五, 但我地果陣係完全唔認識的.


然後我地過佐蝴蝶村, 呢度係我長大既地方, 我由幼稚園到中三都係度住. 我地先去搵我讀幼稚園既地方, 但原來我已經唔記得佐我幼稚園係邊度, 嗚嗚. 然後就行去我間小學, 影佐D相, 跟住我地行佐陣蝴蝶商場, 我以前學琴間琴行仲係度喎~


跟住我地就行去搭車返屋企勒. 估唔到行行下, 終於搵番我以前讀果間幼稚園, 不過個名就唔同佐, 我以前讀果間幼稚園叫「仁愛堂第二幼稚園」, 而家就變佐「仁愛堂葉德海幼稚園」, 其實我真係唔記得我幼稚園既正確位置, 但我諗呢間仁愛堂應該就係我以前讀果間啦掛? 只係改佐名啫...