2008年4月30日星期三

2008年4月14日(一) -- 韓國首爾四天之旅 Day 4

第四日行程, 悶.

 

一朝早去佐護肝寶專門店同韓流化妝品特區, 下午就去明洞, 自己要係明洞自費食埋lunch. 我地試佐個長長軟雪糕, 同埋試佐D街邊小食, 例如腸, 炸薯片同埋好靭既唔知咩魚.

 

臨去機場前例牌去佐間專賣手信既舖頭, 但係我真係無野買得落手, 本來想買D雞泡魚乾, 但我試食完都覺得唔好食. 又唔想買紫菜, 人蔘糖呢D行貨到暈既手信, 果D米通朱古力又唔好食, 所以乜都無買到.

 

之後就去機場返香港囉. 四天既韓國首爾之旅就此結束.

2008年4月26日星期六

2008年4月13日(日) -- 韓國首爾四天之旅 Day 3

第三日, 一早去佐汝矣島睇櫻花, 沿住條大路來來回回咁行, 都幾悶, 櫻花我去日本都睇過啦~

 

 

之後去佐紫水晶專門店, 間野up up dup dup咁... 我當然咩都無買啦~

 

然後去佐人蔘專賣廳, 阿媽買佐D人蔘精比老豆, 因為老豆有糖尿, 之前都有飲開. 二千幾蚊三小樽, 都幾貴耶...

 

今日既lunch係韓國燒烤, 齋燒豬肉(雖然我都唔食牛肉), 都係香港既好食D...

 

下午就去佐Evisu同Langine, 呢度真係專為遊客而開的? 一整層, 右面係Langine, 左面係Evisu, D staff就兩邊都會serve... 我就買佐D護膚品. 另外買佐件Evius T-shirt比流沙包. 人人都話韓國買Evius牛仔褲平好多, 但聽講韓國既Evius同日本既係完全無關係架喎, 只係有人攞佐Evius個名係韓國註冊, 情況就如日本既Porter Tokyo同埋台灣既Porter International一樣... 所以我都無興趣買, 更何況我而家份工都著唔到牛仔褲返工... (上次去關島買佐三, 四條Levi's牛仔褲, 到而家連牌都未剪未著過...)

 

之後我地去佐東大門, 好悶呀呢度, 無咩特別, D商場... 我覺得好似行緊葵涌廣場咁囉... 我買佐D Skin Food而已. 無買到其他野.

 

晚餐食石頭飯. 今晚我買佐D士多啤梨呀, 大大粒好甜好好食呀, 一盒只係W3000, 即係HK$25左右.

2008年4月12日(六) -- 韓國首爾四天之旅 Day 2

第二日一早我地先去佐青瓦台影相, 果度D交通警好型喎, 著晒緊身衫褲踩晒roller咁, 身型又高大, 有D仲幾靚仔添喎~ 個青瓦台無咩特別, 只能夠遠距離咁影張相.

 

 

跟住我地去「韓國傳統文化體驗」, 即係試整泡菜同埋著韓國傳統服裝影相. (旅行社單張又話有親睹製作及品嚐宮廷糕點, 都無既, 呃人...)
 


 

今日既lunch都係食火鍋, 配料主要係餃餃同埋豬肉片.

 

然後去Coex Mall購物, 不過我咩都無買. 嘗試打電話返黎比流沙包, 但係唔成功.

 

最後我地去佐樂天世界, 我地個團只係包入場, 要玩遊戲就要另外加錢買BIG-3或者BIG-5. 我同阿妹各自買BIG-5, 兩張票同阿爸阿媽4個人share用, 我帶佐佢地去睇4D電影, 然後我同個妹就繼續去玩機動遊戲. 由於其中一個遊戲個staff唔記得係我地張票釘窿窿, 所以我地總共玩到六個遊戲, yeah!! 個樂園都幾多人, 個個遊戲都要排長龍.


 

之後就返酒店休息lu~

 

2008年4月20日星期日

2008年4月11日(五) -- 韓國首爾之旅 Day 1

我地第一站去佐一個所謂豪華賭場, 唔駛問梗係導遊可以抽佣既地方. 個所謂「豪華賭場」, 細, 得果十幾張枱, 唔豪華. 逗留佐一陣就走.

 

第二站我地去南山公園, 導遊話類似香港既山頂咁, 係首爾比較高既地方, 可以睇到首爾既景色.

 

 

 

之後我地好早就去食飯, 第一餐係海鮮鍋, 有魷魚, 蜆仔, 青口仔, 菜, 豆腐等等. 味道普普通通啦~


 

跟住我地就去佐Tiger World Water Park玩水, 果度唔算好大, 有D滑水梯, 有按摩池, 有乾蒸同濕蒸既房, 有人造浪池. 唔算好好玩, 另外我玩滑水梯玩到"sir"爛佐件泳衣呀, 穿佐個窿, 嗚嗚, 唔制呀~~

 

最後我地今日又好早去食晚餐, 係人蔘雞, 味道唔錯, 因為我好肚餓, 所以我差唔多食晒成隻雞咁濟.


 

今晚好早七點幾就返到酒店, 所以我就同個妹去佐附近既mall行下勒.

 

好在電視都有NHK睇下, 否則真係悶死人... (房既電視係LCD電視呀, 唔係殘殘舊舊既大PAT PAT電視呀~~) 

 
 

2008年4月10日(四) -- 韓國首爾之旅 Day 0

呢期做下孝順女, 諗住同個妹請阿爸阿媽去旅行. 本來打算去菲律賓的, 報佐名架啦但係唔成團. 於是就求其睇下D旅行社有咩團可以成行出發, 最後係無咩得揀之下揀佐去韓國.

 

我地報佐4天團, 11號凌晨00:30機出發, 所以10號夜晚就要到機場集合.

 

個團combine佐4天團同5天團既團友一齊, 兩團夾埋25人, 唉... 又有細路... 呢D日子唔係要返學既咩?

 

我地搭韓亞機, 個飛機餐我揀佐noodles, 勁難食, D汁好難食, 個面又靭, 我食佐兩啖就無食. 係機上爭取時間訓覺. 當地時間五點幾到達機場, 開始我地既韓國之旅啦~

 

2008年4月7日星期一

中大收佐我啦, 向MASTER之路進發!!

上個月我報佐兩個course, 一個係POLYU, 一個係CU, 兩個course都係professional accounting, 都係QP既conversion program.


我記得POLYU果陣話三月頭deadline, 而CU就2月尾deadline, 由於POLYU可以online application, 所以我2月頭已經報佐POLYU, 而2月尾就報埋CU(郵寄申請).


我剛剛呢個星期就收到CU通知話收佐我, 效率真係快. 反而POLYU真係好慢, 我已經係網上申請, 比CU更早去報名, 但我而家上POLYU個網check, 佢仲係顯示"application being considered". 不過唔緊要啦, 反正CU已經收佐我. 而且好彩CU收佐我先, 如果調番轉POLYU話收我但CU就仲未有消息, 我都唔知去唔去POLYU做入學註冊好.


另外更要慶幸上年我報CITYU果陣佢無收我, 否則我而家又係0係CITYU讀緊, 有得揀我緊係寧願入CU啦~~


不過... 要一次過交一年學費四萬幾蚊,好窮呀~

2008年4月3日(四) -- 擺酒一週年紀念晚餐@聘珍樓

話咁快又一年, 我同流沙包係07年4月7日係尖沙咀聘珍樓擺酒結婚. 話說聘珍樓0係你擺完酒找數果陣, 會送一份禮物比對新人, 呢份禮物並唔似其他酒樓咁, 送埋D咩碗碟果D既垃圾, 聘珍樓送既係五年既週年紀念餐, 即係你呢五年裏面, 每年既結婚週年紀念日, 你都可以去聘珍樓免費食一餐, budget係兩人夾埋一千大元.


由於我4月7日要同屋企人一齊食飯, 所以我同流沙包就提早去聘珍樓食呢餐紀念晚飯. 我初初仲諗住去食免費餐, D招呼會唔會無咁慇勤呢? 但係聘珍樓既服務果然係好專業, 當晚佢地既服務好好, 招呼好週到.


我地叫佐個鮑魚海鮮魚翅套餐, 每位$468. 銀花薈萃其實係拼盤, 有叉燒同燒肉, 唔好睇少呢個頭盤好似好cheap咁, 聘珍樓既叉燒係我食過既之中最好食的! 個燒肉都好好味, 個皮非常之脆.


個翅都不用多說, 正! 材料十足, 唔同其他酒樓果D稀到死咁, 同埋佢係有火係下面暖住, 唔怕好快就變凍.


湯鮑, 味道唔錯, 佢整到好腍, 咬落去剛剛好.


個蝦算OK大隻, 個汁整得好好食.


個上湯烏冬, 個湯底好好味, 我地連湯都飲埋.


呢度既甜品有好多款揀, 包括綠豆沙, 芝麻糊, 合桃露, 楊枝甘露, 雙皮奶等等(我記得以前有布甸...), 我揀佐雙皮奶, 個甜品好特別, 佢底層原來係芝麻糊, 一個甜品兩款口味, 好滿足!


呢餐連埋加一茶芥等, 埋單大約一千零七十元, free佐一千蚊, 我地擺底一百蚊唔駛找.


好正呀!~


2008年4月6日星期日

2008年4月2日(三) -- 悅榕莊免費facial

呢期成日收到好多e-mail, 話送免費facial, 所以我即管去試下.


我當然一直都有一兩間相熟既美容院做開, 亦知道果D所謂免費試做, 其實係氹佐你上去先, 然後游說你開course幫襯佢地. 說實在如果試做完出黎既效果係好既, 我都唔介意比錢幫襯佢地. 就好似我上次去康和堂試做完, 覺得效果唔錯, 所以就比錢開佐course勒.


今次去佐卓越既悅榕莊試做一個什麼香薰facial, 講真我一入到呢間美容院, 個感覺已經唔係太好, 再者果個專氹你比錢開course既所謂美容顧問, 又無笑容態度又麻麻; 幫我做facial果個美容師, 手勢又差, 按面按到我鬼死咁痛, 一D都唔舒服. 所以我試做完之後, 都無聽佢介紹就走佐勒.


另外想同大家講下我之前幫襯過一間叫DR SPA既美容院, 我覺得呢間野呃人又搵笨囉, 次次上去都叫你買呢樣買果樣(樣樣都過千銀); 一係就sell你做新機試新野(夠膽死有D做一次要幾千蚊), 不知所謂, 效果又唔係好(我試果D平均五, 六百蚊一次啦), D美容師手勢又麻麻... 個course做完之後我都無再幫襯勒.

2008年4月5日星期六

2008年3月29日(六) -- 錦田紅磚屋

今日去佐錦田紅磚屋, 本來我地都唔知有個咁既地方, 我地係0係屋苑活動貼出黎既宣傳單張先知有呢個地方. 於是今日就入去行下啦, 本來以為係一個類似跳蚤市場, 好多野睇好多野賣好大好開揚既地方. 點知去到... 真係一間紅磚屋, 裏面有D攤檔, 但地方好細, 裏面既攤檔所賣既野又無咩特色, 我地唔駛半個鐘就行完.



出到黎見到ATV果個黃麗梅係度拍緊野.


之後我地就返屋企, 今晚流沙包做煮飯公.


 

南翔饅頭店 -- 抵食

地址: 荃灣惠荃道22-66號綠楊坊2樓S22 - 23號舖
電話: 3692 4078


上星期五放工同流沙包去佐荃灣食飯, 其實想試下南翔好耐, 但係一直都無機會, 所以今日就決定黎試下. 我地八, 九點黎到, 都等佐大半個鐘先有位.


我地叫佐個二人餐, 有鎮江肴肉, 酸辣湯, 小籠包, 糖醋魚塊, 雞火炒飯, 桂花拉糕同豆漿.


我就覺得幾抵食. 不過個小籠包無我想像中咁好味, D肉汁都無味既...


2008年3月28日(五) -- 麻煩的客...

今朝早有個客突然打黎, 話上網轉錢有問題, 轉唔到, 所以好急咁話要下午落黎香港既銀行搞掂D轉錢. 跟住又話用e-banking果陣有咩咩咩問題(佢講野得佢自己先明, 好難明白佢想表達咩意思). 跟住叫我打電話問銀行要點點點... (轉錢咪做TT囉, 你想問銀行D咩先...?)

 

係我蠢既, 我其實無義務陪佢去銀行, 大佬呀我地係會計師事務所, 包辦公司秘書, 稅務等等. 當初幫你成立佐公司之後, 陪埋你去銀行開立公司戶口己經係我地既bonus service, 你間公司之後有咩問題就自己問銀行啦... 我今次以為佢只係得幾個TT要做, 所以就無推卻佢陪埋佢去銀行啦. 點知去到我先知佢有廿幾間公司要TT... 我就局住每一單TT同佢填TT form, 真係填到我人都顛.

 

本來佢有D數係轉去香港公司, 唔駛做TT, 但佢要用US$找數, 所以又要同佢開多一個US$ current account. 跟住佢有D TT既款項太大, 銀行又要check呢樣check果樣. 我同個客由兩點鐘去到銀行, 搞到五點都未走得(淨係幫佢填TT form都用佐我個幾鐘啦!!). 我見我可以幫佢既野已經幫晒, 於是我就同客講我公司仲有野做, 走先. 個客就繼續留係銀行等攞番個証件.

 

我覺得有時D客真係太倚賴, 我地既service只係幫你做公司秘書, 會計同報稅. 但D客有D咩都走黎問我地, 有D離譜到報關既野都叫我地做, 痴線架!!? (我叫個客自己搵番個forwarder搞掂佢啦).

 

好似今日呢個客咁, 呢次我幫你填埋TT form我只係好心幫你既啫, 我臨走前都拎定一疊空白既TT form比個客, 叫佢下次可以自己預先填佐先拎黎銀行, 點知個客話:「我下個月會將D轉錢公司既資料比你, 你幫我填啦!」. 嘩, 唔係化? 我做埋你私人秘書呀? 你公司既日常業務關我地咩事呀? 於是我同個客講:「客人自己既公司業務我地盡量都唔會牽涉係裏面架, 而且我地都無可能兼顧得到」.

 

唉, 有無人可以教下我, 如果D客提出D無理要求, 根本唔係我地既服務範圍內, 我應該點回應好呢? 又唔可以講得太直接, 要轉婉表達, 唔可以得失D客, 又唔可以令個客bad feeling, 到底可以點講呢? 有無人可以教下我?

Harbourside Cafe (澳門賽馬會會所) -- 嘩, lunch食生蠔, 好似有D過份...

地址: 上環干諾道中168-200 號信德中心301A

 

上星期五約佐個中學阿sir同幾個係中上環區做野既中學同學食lunch. 由於阿sir係澳門賽馬會會員(真係有錢), 所以佢就提議黎呢度食.

 

呢度既lunch每位$168, 半自助餐, 包括沙律吧, 有一個餐湯, 一個主菜及一杯飲品. 半自助餐都算幾多款式, 有生蠔同魚生, 沙律, 生果, 同少少甜品. 主菜就有幾款可以揀, 我揀佐個芝士帶子蝦意粉, 個意粉幾好食, 真係好重芝士味, 都幾heavy, 所以都食唔晒成個.

 

我覺得成兩舊水食個lunch好似好貴咁, 但我覺得值喎, 間唔中黎食下都幾爽架~

 

是次每人消費$168.

2008年3月24日(一) -- 去佐馬灣

話說今日流沙包本來又要去教波, 但係我今日實在忍唔住發佐一次好勁既脾氣, 明明之前問佐佢復活節有咩野做, 佢又話無. 等到臨放假前我再問佢, 佢先至話果日要去教波, 呢日又要去教波...


平時佢放假都要出去教波帶隊果D我都忍勒, 但係復活節咁多日都無一日陪過我出去, 我真係唔多高興. 流沙包見我咁既款, 都無去教波勒(佢呢D義務性質既教練, 隊波教黎教去又唔見有咩進步咁...).


於是流沙包就同我去佐馬灣行下. 自從睇過最美麗的第七天後, 我成日話不如搬入珀麗灣囉, 因為環境好似好清幽好靚咁. 今日終於親身入到去, 交通實在唔多方便喎, 又唔可以揸車, 要坐巴士或者搭船.


環境係幾靚既, 有海有沙灘有橋有花有草, 但係如果真係搬入去住, 我覺得會幾悶. 我平時悶悶地都可以落街行下睇下野行下shop; 但係如果搬入珀麗灣, 行黎行去都係果個島, 要shopping就要落青衣, 葵芳咁... 好似唔係太方便喎.


我今日同流沙包行下馬灣公園, 影下相. 之後我自己就出佐尖沙咀同朋友食飯勒.


2008年4月1日星期二

2008年3月23日(日) -- 我學做一個好老婆

唔駛問流沙包今日又出佐去做野啦, 於是我就約阿媽去飲茶, 飲完茶我就同阿媽去街市買餸返我屋企, 等阿媽教我煮飯, 咁流沙包返黎就有飯食勒.


我地今日煮佐蝦仁炒蛋, 洋蔥豬扒, 炒油麥菜, 同埋煲佐個魚湯.