2009年1月31日星期六

2009年1月25日(日) -- 大掃除

由於之前要考mid-term既關係, 所以間屋根本無時間執, 於是今日就同流沙包係屋企大掃除, 吸塵抺地抺窗換床單換被袋洗衫晾衫洗厠所洗廚房...

 

由朝做到晚, 間屋乾淨晒~

 

做完家務後出去同振宇食飯, 跟住去佐行元朗個花市.

 

元朗個花市好細呀, 好快就行完, 咩都無買到.

 

下年有時間的話都係行番花墟個花市. (維園果個太多人啦, 唔好搞我...)

2009年1月30日星期五

品味 Savour Cafe -- 正!!

地址: 元朗達輝徑3號華健大廈地下3-4號店舖

電話: 2442 2111

 

24號終於考埋個mid-term, 即刻返元朗同流沙包食餐好既. 我地去佐Savour Cafe, 一間係元朗區算係貴價既餐廳. 不過我覺得佢貴得黎都幾有道理, 因為餐廳幾有水準.

 

我地今次叫佐一個鵝肝黑松露菌意大利飯, 一個梅花鹿肉, 另外加$30加個餐湯同前菜焗蠔.

 

 

 

唔多講啦, 全部都好好味呀!!

 

是次消費每人約$220.

2009年1月27日星期二

流沙包都有新玩具 -- i-phone

都係20號同一日, 玩完拆禮物之後, 我係屋企溫佐陣書, 等流沙包放工返黎出去食飯. 食飯之前我地去佐3 Shop, 因為流沙包部電話開始壞壞地, 所以佢決定出部i-phone.

 

係3 Shop差唔多搞佐成粒鐘, 再食完飯返到屋企, 我係度搞部新電腦(未搞上網住, 我都係裝番D anti-virus, Office, set日文輸入法等等, Vista版面用唔慣); 流沙包就搞佢部新電話, 好忙呀!!

 

結果係我無咩溫到書... 24號mid-term啦, 點死呀??!!

我有新玩具啦~ Fujitsu L1010

20號我返佐深圳office, 當我返到香港後打比流沙包, 佢叫我返到屋企後再打比佢.

 

返到屋企打比流沙包, 佢話買佐樣野比我, 叫我自己搵下. 我好快手就係書房搵到舊神秘物體啦~

 

係部notebook呀, Fujitsu L1010~~ 流沙包買佐比我喎, 好開心呀~~~~

 

好野, 以後唔駛同流沙包爭電腦用, yeah! 多謝流沙包既生日禮物.

  

 
 

2009年1月24日星期六

珍味串 -- 日式火鍋

地址: 元朗金輝徑1-13號金輝大廈11號舖地下

 

元朗近打冷同正記大排檔對面開佐間新既日本餐廳, 間舖好細, 唔留意真係唔多覺.

 

星期日同流沙包去佐食飯, 原來佢專門食日式串燒同埋日式火鍋.

 

我地叫佐個海鮮火鍋, 有好多配料呀:

 

素菜類: 冬菇, 蟹柳, 粉絲, 菜, 獅子狗丸, 粟米, 金菇, 紅蘿蔔

肉類: 肥牛, 豚肉

海鮮類: 中蝦, 扇貝, 帶子, 鯇魚片

 

湯底係豬骨湯

 

 
 

 

大家估下呢個set要幾多錢??

 

只係$142咋... 係咪好抵呢? 如果係出面食同一樣既野, 起碼都要三舊水啦... (可參考呢度)

 

串燒係即叫即整, 熱辣辣~

 

同埋老細招呼好週到呀, 又細心, 服務又好, 抵讚!!

 

我極力推介呀~!!

 

是次每人消費約$80

2009年1月23日星期五

2009年1月17日(六) -- 又病...?

(尋日食完D炸野, 今日一起身就喉嚨痛...)

 

話說要係CU畢業的話, 一定要考一個IT test, pass佐先可以畢業.

 

於是今日就同埋個同學仔一齊返學校考.

 

考既野真係超無聊, 要做個word文件, powerpoint, 0係anti-virus software set D野, 同埋有D關於ethics, information security等等既MC題, 勁無聊(但D MC題唔易喎...).

 

考完個IT test, 食埋個飯先去上堂. 但唔知點解, 開始覺得成個人好攰, 手軟腳軟勁眼訓, 同埋個額頭好似慶慶地咁. 咁啱我有帶上次感冒未食完既藥係身, 嗱嗱臨啪番粒發燒止痛同消炎藥.

 

放佐學後腳步浮浮咁返元朗, 今晚仲約佐墨魚氏同流氏兩家屋企人食飯. 去到酒樓時我死頂扮無野(但流沙包話我成個病樣), 餐飯都無咩胃口食.

 

返到屋企再食多次藥, 攰到成pat泥咁, 好早就訓lu.

とん吉 -- 勁熱氣, 但好好食

地址: 銅鑼灣告士打道280號世貿中心412室

電話: 2577 6617

 

上個星期病佐幾日, 好番少少即刻同流沙包去食餐好既. 我揀佐去世貿既とん吉, 呢度主要係食日式吉列炸物, 我地叫佐個二人餐, 有五片魚生, 炸帶子兩粒, 豬扒一件, 豬柳兩件, 炸蝦兩件, 同埋白飯+菜絲任食.

 

食之前可以自己磨芝麻, 雖然真係勁熱氣, 但好食, 尤其是隻炸蝦, 勁好味.

 


 

不過呢D咁熱氣既野, 真係間唔中食一次就夠. (同埋價錢都唔平呀~)

 

同埋星期五晚去, 無得訂枱, 流沙包由六點半開始等位, 等到我做完facial再過去都未有位, 差唔多等佐成粒鐘先有位. (多謝晒流沙包~~)

 

是次消費每人約HK$280.

 


食完飯過佐SOGO地庫買賀年禮盒, 跟住就返屋企lu~

2009年1月21日星期三

2009年1月10日(六) -- 同事結婚

今日有同事結婚, 係中大上完堂之後我先去佐沙田中央圖書館搵書影印, 然後搭火車落尖沙咀, 再搭船過灣仔.

 

地點係華潤大廈皇朝匯.

 

今晚見番幾個舊同事.

 

 

2009年1月17日星期六

2009年1月9日(五) -- 去深圳開會

星期五約佐四點鐘去深圳南山區開會, 我同GM 11點半係office出發, 係上水食佐lunch之後先上去.

 

出奇地個客唔係好多問題, 四點鐘開會, 未夠五點就已經開完. 等到個客五點半放工, 我地一齊去食飯.

 

本來個客帶我地去食中菜, 但點知間酒樓有人擺酒.

 

於是轉地點, 去佐海岸城商場食飯, 估唔到... 吓? 又係火間土? 我之前返深圳已經去過兩次火間土(不過係萬象城果間分店); 估唔到呢度有另一間分店.

 

食物都係OK啦, 不過我唔係好鍾意坐要除鞋入去果D位呀, 好麻煩~

 

食完飯嗱嗱聲返香港, 凍死人啦~~

 

最衰海岸城呢度地鐵到唔倒, 否則得閒黎行下都唔錯, 個商場又大又靚~~

 

2009年1月15日星期四

好討厭打電話去銀行問野!!

我都唔明, 點解個客自己既銀行問題都要我地幫手打電話去銀行問.

 

我地收既accounting fee只係負責幫你做會計.

 

我地收既company secretarial service fee只係負責幫你做公司秘書既野, 同你去銀行開戶口係義務, 其他會計師事務所應該都無咩幾多間會陪埋你去銀行開公司戶口. (鬼叫我地D客係日本人)

 

但係開佐戶口之後, 你公司戶口有咩問題就唔關我地事架啦, 點解你有問題都要我地幫你打電話去bank問呀? 點解連你個人戶口既問題都要我幫你地打電話去bank問呀?

 

淨係打呢D死人電話, 我試過成朝早無做過自己野囉!!

 

個inital deposit要幾多號之前入落account又要問; 你自己個人戶口係咩野類型既戶口又要我幫你去問; 張公司卡可唔可以係國內withdraw cash, 可以withraw幾多又要問; 銀行D service charge點收費又要幫你去問; 你份TT點解做唔到又要我問... 嘥晒我D時間, 問完一大輪又唔可以charge番個客service fee, 真係好X煩呀!!!!

 

D bank staff亦都好討厭, 今日打去問, 明明個staff話可以咁咁咁; 聽日再打去問清楚D, 第二個staff卻說唔可以咁咁咁; 再打第三個電話, 個staff可能又會有第二個答案. 有時只係問一個問題, 但係我就要打兩, 三個電話去問完又問, 好討厭呀!!!

病到七彩

呢幾日(由星期日開始)病到七彩, 之前已經有D感冒(但唔嚴重), 星期日唔知點解, 無啦啦又疴又嘔勁肚痛, 搞到星期一, 二都無返工... 最慘都係典黎典去瞓唔著.


好彩今日無咩野~


如果聽日無晒事, 即刻食番餐好先, 呢幾日淨係食粥同湯飯, 嗚~~


 


 

2009年1月9日星期五

無野搵野黎搞既母語教學

呢排睇新聞有關微調教學語言, 好慶幸自己唔係呢個年代既學生.

 

我都唔明, 點解一定要規定/劃分D學校做英語授課同母語授課啫, 兩者唔可以係同一間學校共存既咩?

 

我以前讀既係英文中學, 用既課本, 做功課, 考試都係用英文. 但係上堂果陣, 好多時老師都係用中文講書, 我覺得咁樣幾好呀. 用既課本係英文課本, 你仍然可以學到實用既英文詞彙; 老師講解係用中文, 令學生可以更容易理解同吸收. 我一直覺得呢個方法唔錯架喎. 點解一定要限死中文中學一定要用中文書用中文授課; 英文中學一定要用英文課本同英文授課啫? 點解要咁死板啫?

 

我覺得學校鍾意用咩咪用咩囉, 最緊要都係因應番學生既程度啫! 最緊要學生學到野啫! 返學唔係為佐追求知識既咩(理論上)? 點解咁白痴要硬性規定中中同英中啫? 難道用邊一種語言教學, 重要性仲高過學校教育能否令學生求學問求知識?  

 

香港既所謂教育是否有點本末倒置了呢? 當初推行母語教學已經係徹底失敗架啦, 令學生兩頭唔到岸. 而家又搞乜野微調, 真係低能.

 

(呢篇BLOG係我前日寫, set佐時間到而家先出. 尋晚睇新聞又話會分咩彈性班, 真係盞搞)

大出血呀...

聖誕+年尾真係倒水既日子, 都唔知點解開支大佐咁多, 我都無乜買野吖(都仲未買notebook), 淨係食下飯, 交下分期付款, 一次過交佐兩個月既保險數咋麻, 我12月竟然要找萬幾蚊卡數, 哎呀~ 殺佐我把啦~

2009年1月7日星期三

2009月1月2日(五) -- 一次過睇晒兩套戲

今日流沙包仲未駛返工, 於是我放佐工就返元朗, 亦唯有係元朗百老匯睇戲.

 

我自從N年前係元朗百老匯睇過戲之後, 我話過以後都唔會再係呢間戲院睇戲. 因為元朗百老匯D House真係細得痴線, 就算坐到最後果行, 你仍然需要岳高個頭睇戲, 辛苦到暈.

 

本來今日淨係打算睇神探伽俐略, 但係流沙包又想睇葉問, 於是我地買晒兩場飛, 七點九先睇伽俐略, 十點二接住睇葉問.

 

其實一次過睇晒兩場戲都唔錯, 因為我同流沙包只會係星期五睇戲(因為AE卡買一送一麻), 但係我地星期五又唔係成日得閒, 好多時想睇果D戲到落畫我地都未有時間去睇, 所以一日睇兩套可以盡量睇晒D想睇既戲.

 

講番兩套戲, 兩套都好睇, 堤真一真係好好戲啊~~ 同幾年前既Good Luck好大分別啊, 完全唔認得係佢黎~~

2009年1月6日星期二

2008年12月31日(三) -- 振宇家party

除夕夜, 公司放三點. 放工後我先入元朗同流沙包去百佳買野, 因為今晚既party要每組人整一樣食物, 我諗到整意大利意吞.

 

買完材料後返屋企整野食, 流沙包大師好勁, 睇下個成果幾得~~:

 



 

跟住就即刻搭車落振宇屋企, 今晚既食物有薯仔沙律, 雜果沙律, 西蘭花焗長通粉, 意大利雲吞, 菠蘿腸仔, 燒雞, 乳豬(勁呀!)同埋豬骨粥(物盡其用).




 

本來今晚好眼訓, 諗住倒數埋就返屋企訓覺. 但今晚打牌手風勁順, 自摸佐兩舖清一色, 今晚嬴佐四百幾蚊~ 最後玩到成六點先返屋企.

 

(代價就係1月1日當天訓到黃昏六點先起身, 好過份呀! 新既一年懶成咁, 訓足12個鐘...)

 

2009年1月2日星期五

2008年12月26日(五) -- 自己家X'mas party

Boxing Day, 約佐墨魚氏同流氏兩家人上黎屋企食食食, 我地主要叫到會, 加上墨魚媽既炒蟹同墨魚爸既自製西米角, 好味好味~~~

 

 

 
 

2009年1月1日星期四

2008年12月25日(四) -- 振宇家X'mas party

聖誕日, 首先出佐沙田宜家傢俬睇書枱, 但結果令人失望, 都無款既.

 

之後係City Super買佐D野食就去振宇屋企玩.

 

 
 
 

向體育老師致敬

尋日睇頭條日報, 見到King Sir既專欄, 我突然有感而發...


尤其是說到"假日亦經常要帶隊出外比賽... 假日亦不見得清閒", 這簡直就是流沙包的寫照.

 

體育老師是沒有週末或假期的, 甚至乎我們上週六的結婚註冊紀念日, 他亦要出外帶隊參加這個「全港學界精英排球比賽」; 也試過聖誕佳節要帶校隊飛到大陸進行為期數天的集訓.

 

其實嫁得比體育老師, 我就應該一早預佐他有假期=沒假期, 不應該時常黑面或者發老脾. 講真我不是一個合格的老婆.

 

說實在讀書不是我的興趣, 只是... 如果我不讀下書等自己都好似好忙假期都要匿係屋企溫書的話, 我想我埋怨他的時間會更加多...