Soft Aroma -- 可愛咖啡圖案

地址: 上環永樂街105號地下

電話: 2541 0666

前幾日同同事出街食lunch, 間餐廳既意粉麻麻地好食, 但杯咖啡就非常可愛.

 

平時我見D咖啡造型都係畫吓花呀, 樹葉呀, 心心呀之類; 估唔到呢間餐廳竟然會畫公仔架.

 

仲有我心愛既Keroppi添喎(呢杯Mocha唔係我, 係我同事的):

 

好鬼可愛呀~~

Keroppi背囊

哈哈哈, 雖然我年紀已經唔細, 但心智仍然係低B一族.

 

某日同流沙包去新元朗中心睇戲, 仲未夠鐘入場, 於是我地就行吓呢個根本無咩野好行既商場.

 

估唔到果度有一間精品店喎, 仲比我發覺佐呢樣野:

唔係講笑, 我真係買佐, 而且仲有用既打算. 睇吓幾時有機會去旅行用吓呢個背囊先, 哈哈哈.

低B完畢, 多謝各位收看.

屋企新成員

我地屋企最近多佐D成員, 佢地係:

　

 

初初新C坑三日香, 玩佐幾次之後, 我過佐幾個月都未掂過佢地.

 

我連係屋企做運動都懶, 我無得救架啦...

 

 

 

 

 

 

R66旋轉餐廳

地址: 灣仔皇后大道東183號合和中心62樓

電話: 2862 6166

 

6月30日, 我同流沙包去佐合和中心既R66食buffet.

 

去得R66都唔係旨在要食D咩, 主要都係睇香港夜景既啫. (不過我地係因為想用佐張buffet club既coupon先去幫襯, 並唔係有咩特別事想慶祝)

 

初初打電話去訂枱果陣明明話無晒窗口位(其實我都無要求想要窗口位), 估唔到去到果陣, 我地竟然可以坐係窗口位喎, 呵呵~~

 

我無帶相機去呀, 用iphone影架咋, 效果麻麻...

 

 

 

 

 

 

九州之旅Day 8 -- 返香港啦~~

2010年4月7日(三)

 

4月7日係我同流沙包既擺酒紀念日呀~

嗚, 我終於都要離開住佐大半年既日本, 要回歸香港啦, 真係好唔捨得呀!

飛機上, 流沙包想食既beef比人揀晒, 空姐話有fish可以揀, 仲係business class既餐黎架喎:

台灣過境中:

 

過境後上返機, 又食:

 

 

 

 

係九州呢8日我真係好開心呀, 旅程叫順順利利(除佐Day 3唔記得開locker拎行李), 九州既自然景色真係好靚. 本來8日行程我想顛到去均九州咁多個縣架, 亦都嘗試plan過, 但發覺真係無咩可能, 所以南九州唯有留待下次啦.

 

另外我覺得九州有好多地方唔揸車去真係唔得, 今次既九州之旅令我愛上佐自駕遊呢~

 

日本我已經去過好多地方啦, 如果下次再黎日本, 我估我會去四國, 不過唔知會係幾多年後既事lu. 希望到時候我既日文可以變得超流利啦~

 

好啦, 九州之旅正式完結啦. 黎緊我會出埋D已經寫好佐但仲未有機會post出街既東京研修生活既blog, 希望大家繼續捧場啦.

4月8日要返番香港office返工啦, 唉... 

九州之旅Day 7(part 2) -- 湯之坪街道(大分縣), 福岡

2010年4月6日(二)

 

離開九重夢吊橋, 我地就揸車返湯布院啦, 由於未夠鐘還車, 所以我地就泊低架車係超市停車場, 然後行吓湯之坪街道, 順便買D小食當做lunch.

 

 

 

 

 

呢個超大形墨魚丸波波好搞笑呀:

 

 

我仲買佐呢杯黑醋飲品, 好難飲...:

仲係超市買佐一大堆野:

仲有呢個鬆弛熊朱古力咖啡:

行完湯之坪街道, 我地揸架車去還, 然後去JR車站搭ゆふいんの森去博多.

還車前當然要入油啦, 入油果陣要將呢張"入滿油証明"比油站職員蓋印, 還車果陣要交比租車公司証明你入滿佐油:

 

尋日我地搭呢班車由大分黎湯布院, 今日我地搭番同一班次由湯布院去博多.

 

 

我地仲遇番尋日同我地合照果位靚仔乘務員, 佢認得我地兩個呀, 仲問我地玩得開唔開心~

 

由湯布院去博多車程比較耐, 要2小時多D.

 

返番黎博多, 表示我地呢個九州之旅就快結束啦, 我地今晚住返DAY 1~2住既Sunroute Hotel.

 

黎到福岡無理由唔去屋台食野架麻, 於是我地夜晚去天神站附近搵屋台食飯, 求其揀佐一間.

 

 

 

 

 

 

屋台個嬸嬸幾好人呀, 間中同我地傾吓計, D野都幾好食.

 

食完飯我發狂咁搵書店, 因為有本書我仲未買呀. 聽日就要返香港啦, 返香港先買一定貴好多啦. 但估唔到係九州搵書店係咁難架, 係東京通街都係書店架麻, 但係九州竟然好難先搵到一間.

 

好彩終於都買到:

嗚, 聽日就要返香港啦, 嗚... 唔制呀~~~

狂煲日劇

呢期唔知點解, 突然間好有興趣煲番D日劇.

 

其實好多日劇我都無睇過架, 無法啦, 之前幾時一直掛住讀書考試, weekend有時間的話都要係屋企溫書做功課, 邊有時間同閒情睇日劇呀.

 

呢排天氣鬼咁熱, 放假都唔想出街, 加上而家完全無讀書無進修, 所以一有時間就摷番D陳年日劇黎睇.

 

Bloody Monday 1&2

我兩輯都睇晒, 但我覺得呢套劇勁多犯駁位, 好多劇情都好唔合理, 最頂唔順既係有咩理由乜鬼野都要靠晒高木去搞掂架? 日本警方D人全部都廢架?

 

螢之光

因為知道而家日本已經播緊第二輯, 所以我早前嗱嗱臨睇番晒第一輯, 真係好正好好睇, 勁鍾意部長果種外冷內熱, 好欣賞凌瀨遙真係好"入型入格".

 

Liar Game

係呀, 我都仲係睇緊第一輯咋, 而家只係睇佐頭五集, 但真係睇到唔捨得訓, 我幾鍾意睇呢D要用吓腦既片種, 二回戰既少數決比賽真係好好睇.

 

煲完Liar Game後都未諗到煲邊一套好, 大家有無好推介呀? 幾舊既都唔緊要架, 反正我8月就會開始油牆, 寓睇日劇於學日文~

九州之旅Day 7(part 1) -- 九重"夢"大吊橋(大分縣)

2010年4月6日(二)

 

今日我地係旅館食早餐, 但個早餐好唔掂:

 

check-out後我地去到租車公司, 呢間租車公司好搞笑, 因為之前我地係熊本租車果陣, 個staff同我地一齊check車架麻, 於是我地今次自己又check吓部車啦, 點知個staff無叫我地check車不特止, 佢見我地圍住架車係度check, 佢不斷話"呢架車係新架, 無野架, 新車落地行佐xx公里架咋".

 

如果呢度唔係日本, 我地一定唔會啋佢, 一定check清楚為止, 容乜易我還車果陣你屈我整花佐架. 不過呢度係日本, 我相信日本人做生意係比較老實既, 既然佢咁講, 我地就唔再check, 信佢啦.

我地既戰車:

今次租車我地只係租四粒鐘, 因為我地既目的地只有一個, 就係九重"夢"吊橋. 本來有巴士可以搭到去既, 但係班次疏麻, 所以都係租車去, 自由度大D麻.

 

大家請睇吓呢幅GPS, D路... 小腸黎架?:

 

今次我地無盡信GPS, 都有自己睇吓地圖既, 用佐1個鐘頭左右, 終於由湯布院黎到九重夢吊橋啦~

 

 

 

呢條係全日本最長既吊橋黎架(全長390m), 過橋要比500円.

 

 

 

 

去到橋既另一面啦~

 

過到橋既另外一面, 有座小山可以行上去, 上面有D so-called展望台可以望吓風景, 不過橋既對面其實無咩特別野好行, 所以無幾耐我地就行返過對面啦~ 要行番過對面果陣要show一show你張飛架, 所以千祈唔好整唔見, 否則你就要花錢再買張飛先可以過番對面架啦.

 

 

 

 

橋既附近仲有呢個景點:

 

 

九重夢吊橋呢度有一款出名既九層漢堡包, 我睇見都覺得飽, 所以無買黎試: