2010年11月30日星期二

用咗曲奇模整既曲奇餅

某日落個fd屋企打麻雀, 於是整咗D北海道牛乳布甸同埋曲奇餅去.

我終於買咗曲奇模啦, 分別係心形, 米奇頭同埋圓形波浪形.

好似好難先搵到呢D可以做到中間通窿既曲奇模, 有無姊妹知道邊度仲有得賣?(我見過City Super有, 但價錢唔平):





仲係二德惠買咗個曲奇餅罐($18), 靚晒:


食譜可參考呢度 (我參考咗fat12565既意見, 用少咗牛油, 我今次只係用咗150g, 口感幾好, 下次都會用少D牛油去整, 健康D)

係度想呻兩句, 我個米奇頭同圓形波浪形模係元朗華都商場1樓某間烘焙店買, 由於我之前無格過價, 行過見到咪買囉, $8/個.

點知過幾日去咗元朗同益廣場1樓果間Cake Secret, 見到只係賣$6個, 嗚...

再過幾日, 我去咗荃灣二德惠買野, 見到一模一樣款既曲奇模, 只係賣緊$3.5/個咋, 又當場噴血!!

不過最想講既係, 我買$8個都覺得自己死蠢啦, 有日去咗元朗區大家普遍認為價錢最平既果間家政坊, 我見同款既曲奇模, 果度竟然賣緊$10/個???!!! 唔係化...? 有無搞錯呀? 咩家政坊唔係已經係全元朗最平既呢咩? 點解會賣成$10/個架?? 以後真係要好好格吓價先得.

2010年11月29日星期一

野菜豚肉燒 (附食譜)

食譜參考: 自己諗

材料:
1. 切片豚肉 $6
2. 野菜 (我用咗娃娃菜1棵) $0.83
3. 洋蔥半個 $1.15
4. 薑
5. 蒜頭
6. 生抽



步驟:
1. 洋蔥, 薑, 蒜頭切片
2. 生抽落鑊煮熱, 加入砂糖及胡椒, 盛起

3. 油熱下蒜頭爆香, 加入豚肉炒至半熟, 再將剛才的生抽倒入
4. 加入洋蔥, 薑, 菜炒熟, 上碟  



大約成本: $8

事後檢討:
1. 菜唔係好夠, 下次落2棵

2010年11月28日星期日

超賤的護膚品包裝!!!

我曾經係韓國旅行時買咗D護膚品返黎, 其中一支晚霜, 我明明新開黎用無幾耐咋麻, 有咩理由咁快就用晒...?



於是我打開裏面睇吓, 咦, 個樽好乾淨喎, 我用到一D殘餘物都無...?:


咪住先, 個頂部有個漏斗形既物體既?:


睇清楚, 我頂, 原來成支cream咁大個樽, 但D cream得個漏斗咁少既容量??!!!:


我插隻手指入去篤咗兩吓, 個"漏斗形容器"比我篤落咗少少, 有無搞錯呀? 咁都得!? 咁大個樽但D cream只係得少少, 比個死人包裝呃咗添!!! 等我仲以為咁大支有排用!!!!:


真係火都黎呀, 我記得支野維番港紙好似最少兩舊水架喎!!! 真係離晒譜!!! 如果大家去韓國有緣見到呢支野, 千祈唔好買呀! 又吾係好用喎!!!

2010年11月27日星期六

咖喱薯仔雞翼 (附食譜)

食譜參考:
http://shirleyliving.mysinablog.com/index.php?op=ViewArticle&articleId=995164

材料:
1. 薯仔 $3.675
2. 雞翼 $14
3. 洋蔥 $1.15
4. 薑
5. 蒜頭
6. 乾蔥 (我無落到)
7. 咖喱粉



步驟:
1. 雞翼解凍洗淨, 用薑汁, 酒醃最少半小時 (我求其用咗生抽醃)
2. 薯仔去皮切件
3. 薑切片, 蒜頭拍扁, 乾蔥切半備用
4. 熱鑊下油, 爆香雞翼至微金黃色, 盛起備用
5. 下洋蔥爆香
6. 加入薑, 蒜頭, 乾蔥炒香
7. 加入薯仔, 將雞翼回鑊炒勻

8. 加1~2湯匙咖喱粉爆香
9. 加滾水至剛浸過雞翼面(我要個鑊整其他餸, 所以轉咗落煲整)

10. 煮滾後下鹽調味
11. 蓋上鑊蓋煮15~20分鐘
12. 開蓋再試味/調味, 煮至收汁便可 (如有需要可用生粉水埋芡)



大約成本: $20

事後檢討:
1. 雞翼唔係好入味, 咖喱汁又唔係好有咖喱味. 下次試吓用第二個方法整

2010年11月26日星期五

牛油皮蛋撻 (附食譜)

想整蛋撻想咗好耐, 但係喺元朗竟然唔多覺有蛋撻模賣(無我想要果D size), 要去到荃灣二德惠買咗撻模先可以整.

食譜參考:
http://www.christinesrecipes.com/2009/03/cantonese-egg-tarts.html

材料(我用7.5x4.5x2cm既撻模, 大約整到15個):
撻皮
1. 麵粉 225g $4.47
2. 牛油 125g $8.45
3. 糖霜(icing sugar) 55g $1.375
4. 雞蛋 1隻 $1
5. 云呢嗱香油 少許

蛋汁
1. 雞蛋 3隻 $3
2. 幼砂糖(caster sugar) 110g $0.84 (我都唔係好知咩係幼砂糖. 我用咗普通白砂糖, 同埋只用咗80g)
3. 熱水 225g
4. 花奶 85g $1.7
5. 云呢嗱香油 半茶匙



步驟:
撻皮
1. 牛油放室溫回軟, 用電動打蛋機打散, 分兩次加入糖霜, 用電動打蛋機慢速打勻, 打到直至牛油變淡黃色

2. 雞蛋發勻, 分兩次加入牛油, 慢速打勻
3. 加入雲呢嗱香油拌勻
4. 分兩次篩入麵粉, 用膠刮人手拌勻

5. 搓成粉團後, 取出適量搓成小圓球, 用手壓扁後, 放在撻模內, 用兩隻大拇指壓好撻皮. 壓的方法: 由撻底開始, 一邊壓扁, 一邊轉撻模, 然後將麵團輕輕向周圍按壓成厚薄均勻的模樣


蛋汁
1. 砂糖+熱水拌勻至糖完全溶解
2. 雞蛋+花奶人手打勻, 加入糖水, 攪拌至完全混和

3. 用篩過濾蛋汁, 隔去蛋汁的粒粒和泡沫, 倒進蛋撻模內. 可以倒至九成半滿, 因為出爐後蛋面會收縮


入爐
1. 入爐180焗25分鐘, 如果見蛋汁開始凝固並脹起, 就要打開焗爐門少少繼續焗至熟為止. 咁做是避免蛋汁脹得太快太高, 出爐後蛋面就唔會下陷咁肉酸

2. 出爐後可用牙籤插入蛋汁, 如牙籤可以自己豎立, 即表示熟透



(D蛋汁同麵團無一次過焗晒, 隔咗幾日先再焗第二次:
)


(焗第3次:)


大約成本: 約$21 (約$1.4/個)

事後檢討:
1. 個撻皮好硬好實, 一D都唔鬆脆, 而且食落無咩味, 下次試吓用金桶牛油or轉低筋麵粉整
2. 第一次整, 我覺得我個撻皮整得太厚, 下次壓番薄D. 同埋個撻皮壓得唔靚, 尤其是個撻邊, 焗完出黎好多裂位
3. 蛋汁可以加番多少少糖, 下次試吓落90g

2010年11月25日星期四

石板街朱古力慕絲 (附食譜)

食譜參考: 劉偉雄著既《甜品姿味》第72~73頁"石板街朱古力慕絲"(天地圖書有限公司, 2008年5月出版).

材料(我用L18xW8xH6cm長方形模): (以下係原食譜一半份量)
1. 朱古力 100g $5
2. 核桃 20g $3.2
3. 棉花糖 隨意
4. 魚膠粉 3.5g $0.574
5. 砂糖 15g $0.1575
6. 沸水 50g
7. 淡忌廉 125g $5
8. 葡萄 150g (我用咗提子乾)



步驟:
1. 將朱古力座熱水直至完全溶化

2. 將淡忌廉打發至半起

3. 核桃稍焗一會, 至呈金黃色
4. 砂糖+魚膠粉先撈勻, 再注入沸入拌勻成為魚膠水
5. 加入已溶朱古力拌勻, 待涼 (加入朱古力漿時, 魚膠水一定要夠熱, 否則朱古力會變硬及起粒)
6. 先加入一半已發好的淡忌廉, 拌勻

7. 如混合物呈漿狀, 再倒入餘下一半的淡忌廉, 拌勻, 成為慕絲漿 (但如混合物呈水狀, 表示混合物溫度仍然過高, 此時就勿再倒入餘下的淡忌廉, 應待混合物涼透後才再倒入)

8. 先倒一半慕絲漿入模內, 將葡萄, 核桃, 棉花糖放在慕絲漿上, 直至鋪滿表面 (要快手, 否則餘下的慕絲漿或會變硬)

9. 將餘下的慕絲漿倒入, 抹平表面, 放入雪櫃雪3小時




大約成本: $15

事後檢討:
1. 味道, 甜味剛剛好, 我好滿意, 如果個面可以加番D裝飾就perfect勒~
2. 棉花糖因為輕身, 所以會浮晒上黎, 有咩方法可以令佢唔好浮起呢?

2010年11月24日星期三

R.I.P William

Dear William,

對不起, 真的對不起.

我竟然不知道你已經離開了我們, 也不知道你原來已離開了那麼久.

昨晚深夜, 突然間在FB收到阿賢的message, 他只留了"Chloe...", 我覺得很奇怪, 於是看看阿賢的FB, 見他竟然寫上了"R.I.P. William", 我當時呆了一呆, 然後立刻去看看你的FB. 只見你的朋友給你的留言, 看不見你給朋友們的回覆. 再仔細看下去, 怎麼你朋友的留言這麼怪, 一直看到去年3月時的留言, 才知道原來那時候你已經離開了我們.

我一路看著那些留言, 眼淚便不自主地流下來, 不是吧? 你還這麼年輕, 才二十多歳, 不正是人生最燦爛的時候嗎??!! 回想起多年前一起在TDK工作的片段, 你總是笑容滿面, 表情帶點傻氣, 努力工作, 從不與人計較, 我們從來不察覺你身體有毛病. 我們離開TDK後, 間中都會約出來打麻雀, 你也有出席我的婚禮. 可惜之後大家各有各忙, 已很少再聯絡了.

而我竟然不知道你已離開了的消息, TDK的舊同事應該全部都不知道吧? 因為阿賢說他也是前幾天才得知. 真的對不起, 竟然沒有去送你最後一程... 而我, 去年8月我要去日本研修時, 有send e-mail給我所有朋友通知他們, 當時我還發了e-mail給你, 但原來你去年3月已經離開了我們. 我卻懵然不知, 還過份得send了那個e-mail給你... 對不起.

常見報章報道 現在很多人是在FB得知親友離開的消息, 我當然還慨嘆科技到底是給人類拉近了距離, 還是阻隔了大家的真感情. 估不到我竟然也是透過FB, 通過你朋友給你的留言, 才知道你已離開的消息. 不過, 你身邊真的有好多好朋友, 雖然你已經離開了我們快2年了, 但你的好朋友還是會keep住在你的FB留言, 訴說他們自己的近況, 告訴你某某已結婚生仔, 向你傾訴他們的煩惱... 如果人生不是在乎長短, 而是在乎精彩與否, 我想你已經做到了, 你有一班這麼要好的朋友, 我相信你離開後也不會感到寂寞吧...? 雖然看著這些留言時, 鼻子一直酸酸, 眼淚不停流下來; 但我心裏卻因為你有著這班摯友而覺得很溫暖. 我相信我離開後, 我的FB應該是寂靜一片的, 因為我沒有多少個好朋友.

William, 就如你朋友在你的FB所說, 縱使你已離開, 但你的FB仍然是這般熱鬧, 彷彿你根本就沒有離開過. 對啊, 你已經活在了大家朋友的心中. William, 我會永遠懷念你的笑容.

懷念你的
Chloe

2010年11月24日

2010年11月23日星期二

油牆假期再次開始~~ (下集)

做咗半日我已經覺得間公司唔對路, 匿入toilet打比個舊同事吹咗兩講, 佢話D細firm係咁架啦, 唔會有會計軟件啦, 做野好求其啦, D野唔會做得咁足咁詳盡啦... 嗚, 我唔要做呢D公司呀~~ 我係位呆望住D文件, 腦裏面突然間諗返起舊公司既片段, 突然間竟然好掛住舊公司既工作手法同埋D同事呀, 嗚~~ (舊公司其實係幾好, 做事好正規正統, 令人討厭既係果個日本人老細)

後尾喺新公司其他同事收到D料, 呢間公司連tissue都無, 要自備. 老細唔肯出錢買多部新電腦, 現有既電腦唔係全部上到網, 有D上到網既電腦, 都係啱啱先轉用寬頻, 無耐之前仲係用緊56K喎(係真唔係呀)?! 最驚嚇係我聽佢話老細係唔識用電腦架! 我問佢咁send e-mail呢? 佢話老細自己會手draft完比其他同事打喎... 我裝過吓老細間房, 真係唔多覺有電腦係裏面喎...!? 仲有呀, 我第一日返工, 公司唔比我知門口個password都唔奇; 但我見喺度做咗半年果位同事, 我見佢出入都係要按門鐘, 原來佢做咗半年都唔知門口password係咩, 呢間係咩公司黎架?? 本來仲有好多奇怪野, 不過真係未經証實, 就無謂寫出黎啦.   

另外呢間公司用開XX銀行, 佢要我係XX銀行開個戶口出糧, 因為佢話喺其他銀行戶口出糧會令佢有D bank chg喎. 但我問過, 開張提款卡要收我$50年費喎, 我覺得你無理由將你既cost轉嫁係我身上架?! 我星期一晚等其他同事走晒, 問老細我可唔可以用番自己匯豐戶口出糧, 因為提款卡要比$50年費. 老細竟然話"咁你唔申請提款卡咪得囉". 吓? 你唔係諗住我個個月去counter排隊攞錢呀? 老細話"XX銀行平時都無咩人排隊, 你去開銀行/lunchtime果陣去咪得囉".

嘩, 我真係啋你都傻, 我本身用開HSBC Premier戶口架麻, 而家都唔駛比咩月費/年費. 我無理由無啦啦開個XX銀行戶口出糧架麻. 我D卡數, 自動轉賬, PPS, 保險全部都係HSBC過數, 即係第時我每次出糧後, 要係XX銀行拎錢出黎, 然後存番晒入HSBC囉喎?

總之就係以上種種原因, 令我返咗一日工就決定唔做啦, 我覺得呢間公司唔值得我嘥時間, 果一日糧我豪比你.

今次誤打誤撞咁比我做咗一日香港公司, 我覺得好似有D啟示咁. 經過今次事件之後, 令我有D反思:
1. 我應該都係做唔到D得果幾丁友既細公司; 就算做細公司都要做番日本公司, 起碼福利, 環境, 待遇都好得多.
2. 我覺得我都係唔應該放棄日文, 始終係我既本錢之一, 所以我諗都係"脫離"唔到日本公司住架啦~ 香港公司真係好得人驚呀~~ 要我逗少D人工係一間唔鍾意既local firm做, 我不如叫番高D個價 係間唔鍾意既日本公司做.

油牆假期再次開始~~ (上集)

之前咪話我搵到工, 星期一返工既~

但係尋日返咗一日工, 我就決定咗唔做啦. 今朝打咗電話返去話覺得自己都係唔適合呢份工, 然後fax咗封辭職信話自己not capable of doing the job之類.

我自問都唔係D亂轉工玩玩吓既人, 我都無諗過自己會係D返咗一日工就話唔撈既人. 但最主要係呢間公司比我既感覺好差呀.

我成世人未做過D少過30人既公司, 亦未做過香港公司. 而今次呢間係5個人唔夠既細local firm. 我當初都已經無咩期望架啦, 但估唔到間公司仲差過我當初估計既.

朝早個admin帶我兜咗公司一個圈, 間公司好舊好亂囉. 我唔知點解佢牆邊要疊滿晒舊報紙, 疊到成個牆邊都係, 高度仲要疊到半個人咁高. D文件呀file呀又周圍都係. 我朝早係位呆坐無野做住, 咪睇吓個位有D咩囉, 我見到有本講HK taxation既書, 吓? 1997年版? 仲留係度做咩呀? 跟手見到本講company secretary既書, 無記錯好似係198x年版? 嘩~ 呢間公司賣古董架?

細公司無pantry, 有個位置放咗水機, 一個N年前款式果D要溶雪既雪櫃, 一個微波爐. 我打開個矮櫃睇吓(想搵吓有無紙杯/飲品沖劑之類), 個櫃裏面又係超亂, 我唔知點解佢櫃裏面放咗好多大快樂果D外賣紙杯(連膠杯蓋)係度, 放到一櫃都係, 而且唔係整齊咁放喎, 係東一個西一個咁擺, 充斥晒係個櫃裏面... 想點呀?

跟住就黎要走個女仔就簡單講解吓我會接手既文件同工作啦, 佢話比我知公司無會計軟件, D野要用Excel去砌, 吓? 唔係呀?? 跟住我自己拎D文件睇吓啦, 感覺上所有野做得好求其, 果D jobs根本學唔到野. 佢tax既野同accounting既野又file埋一齊, 點解會咁架? 睇吓佢個tax computation, 嘩, 簡單到吖, 無breakdown架喎. 我以前公司好有系統, 所有野file得好清楚, 所有jobs都做得好清楚好認真, 就算最最簡單無fixed assets果D客仔, 我地個tax computation都會有4~5頁, D sundry expenses之類都一定做晒breakdown架麻. 同埋我感覺呢間公司好似仲停留係90年代咁囉, D客係做咗十幾年果堆歐洲客, 好似無新客咁既? 感覺上呢間公司好似無咩進步, 同社會脫咗節咁...

待續...

晴天pig pig!!! 雪櫃壞咗!!!

上星期五我出咗新公司簽約, 跟住去咗觀塘上興趣班, 夜晚去百佳買D野諗住喺屋企煮個簡單飯. 買完野返到屋企八點幾, 一打開雪櫃, 發覺雪櫃又壞咗啦!!!

個雪櫃係當初一手樓果陣送既家電, 都用咗好多年, 其間亦壞咗幾次又整過幾次, 估唔到早唔壞遲唔壞, 呢個時候先走黎壞!!!! 你早D壞我都無咁慘, 一來我仲放緊假, D師傅/送貨幾時上門都得吖麻, 但我啱啱黎緊會返新工, 你就等我臨返工最唔得閒果陣先走黎壞, 激死我!!!

另外就係我應承咗個friend, 整個生日蛋糕聽日送比佢架, 但雪櫃壞咗, 我早前買定既材料全部報銷啦!! 嗚!!! 另外個蛋糕整咗都雪唔到, 咁個蛋糕唔駛整啦!!!

講番個死人壞雪櫃, 我本身買定咗好多材料諗住隨時可以煮飯仔架麻, 而家點算呀? 於是把幾火將雪櫃所有材料拎晒出黎, 一餐煮晒佢. 我本來諗住今晚一個人係屋企煮個簡單飯咋麻, 但我一個人一定食唔晒咁多野啦, 於是即刻call個住附近既friend上黎食飯, 我就即刻開工煮飯.

一大堆材料:



我真係覺得自己好勁囉, 我最後煮咗四餸一湯出黎, 仲要係一個鐘頭就煮好晒, 我呢個地獄廚神真係進步神速呀, 哈哈!!

以下為大家介紹四餸一湯.

冬瓜豆腐火腿丸海鮮雜燴湯:


西汁雜豆火腿煙肉洋蔥豬扒:


咖喱火腿雜豆雞翼:

 
豚肉燒:


仲有個豉椒蒸排骨, 不過唔記得影相.

本來D餸我諗住夠我食一個星期架, 而家要一餐煮鬼晒:


流沙包呢晚返學, 佢放學返到黎, 迫佢埋位食飯, 唔好嘥咗D餸.

食唔晒既餸我比埋個friend拎走, 另外我將雪櫃一D值錢既野比個friend拎返佢屋企, 我D魚子醬, 忌廉芝士, 酥皮呀~~~ 嗚~~

我個friend拎走既野: